Bible in duytsche (Delftse bijbel 1477)

§ Ca .x.

1

MAchabeus ende die mit hem waren mit des heren bescermenis so wan hi den tempel ende die stat weder:

2

ende hi brac den outaeren dien die heydenen inden straten gemaect hadden ende die tempels.

3

Ende als hi den tempel gesuuert hadde so maecten si enen anderen outaer: ende si ontfinghen vyer vten gheuyerden stenen. ende si offerden sacrificien nae twee iaer: ende leiden thimiama ende setten die lichtuaten ende leiden broden der proposicien.

4

Als dit ghedaen was so vielen si langs op der aerden ende baden den heer: dat si nemmermeer in soe groot quaet vallen en mosten. Mer waert dat si sondichden ymmer dat hijse guedertierlic castien woude: ende dat hise niet en leuerde den wilden blasphemerenden menschen.

5

Op dien dach dat die heiden den tempel besmetten: het gheuiel dat hi opten seluen dach ghesuuert wort opten vijf ende twintichsten dach der maent casleu.

6

Ende si daden die suueringhe mit blijscepen inden zede vanden tabernakel achte daghen lanc: ende si gedachten. dat sij ouer een luttel tijts daer voer hadden gedaen den feesteliken dach vanden tabernaculen inden bergen ende holen naden zede vanden beesten:

7

ende om dat droghen si voerden heer ionge scoten ende groeyende telgheren. ende palmen. die voerspoet ghegeuen hadde sijn stat te suueren.

8

Ende sij gauen wt dat alle die ioden elcs iaers dese daghen souden vieren mit vonnissen ende wt ghemenen gheboden.

9

Ende den wtganc van anthiochus leuen die mit hem hete edel was aldus.

10

Mer nv sullen wi vertellen van eupatore des quaden anthichus soen. wat daer ghedaen wort: ende corten tquaet dat inden stride geuiel.

11

Als dese dat rijc ontfaen hadde so settede hi bouen die oerbaerlicheit van den rijc enen geheten lysiam die maerscalc was vanden ridders van fenicen ende syrien.

12

Want pholomeus diemen hete macer. meende te wesen houdende dat recht ouer den ioden: ende sonderlinghe omt onrecht dat hem gedaen was: ende hi meende vredelijc mit hem te doen.

13

Mer hier of wort hi gewroecht

[p. *644e]

van vrienden voer eupatore: ende doe die verrader dicwijl hoerde dat dese ptholomeus cypren ghelaten hadde. daer hem philometor bouen geset hadde: ende dat hi ouerghecomen was totten edelen anthiochum. ende dat hi oec weder van hem ghetoghen was: ende daer wort hi mit venijn vergheuen.

14

Ende om dat gorgias leitsman was vanden steden. soe nam hi mit hem die toecomelinghen ende beuacht dicwijl die ioden

15

mer die ioden die de vaste steden hielden die ontfinghen die ghene dier verdreuen waren van iherusalem: ende die pijnden hem te striden.

16

Mer die mit machabeo waren. si baden den here mit gebeden dat hi haer hulper wesen soude. ende si deden oploep op die vaste steden van ydumea:

17

ende dat si mit groter macht op vochten soe wonnen sij veel steden. ende die hem teghen quamen sloghen si doot: ende si slogender daer al tsamen doot wel vijf ende twintich dusent.

18

Mer sulcke vloghen in tween toernen die vast waren. ende hadden daer alle ghereetscap mit hem om te wederstaen:

19

ende machabeus liet symon ende ioseph ende zacheo om dat sijse bestriden souden mitten ghenen die mit hem waren dier ghenoech was ende hi keerde hem ten anderen stride waert die hem meer pijnde.

20

Mer die mit symon waren worden mit ghiericheden verleit. vanden sulcken die inden toren waren wort hem gheraden mit ghelt. ende die ontfingen tseuentich dusent dubbel dragmen siluers. ende si lieten sommige ontvlien.

21

Ende doet machabeo geboetscapt was dat daer gesciet was soe vergaderde hi die princen vanden volcke. ende hi wroechdet dat si die bruederen om ghelt vercocht hadden. ende sat si die vianden hadden laten gaen.

22

Ende die gene die dus verraders geworden waren die dode hi ende beleide te hant die twee toernen.

23

om dat si mit wapen ende mit handen vromelic daden: so doden si in desen twee toernen meer dan twintich dusent man.

24

Ende thymotheus dien die ioden verwonnen hadden hi vergaderde een heer van vreemder menichten. ende hi vergaderde theer vanden gheredenen van asien: als of hi iudeam met wapen soude verwinnen.

25

Ende machabeus ende die mit hem waren die hij hem naecte soe baden sij gode. ende stroeyden aerde op haer hoeft: ende gorden hem op haer lendenen.

26

ende laghen voerden outaer: om dat hem die here goedertieren wesen soude. ende dat hi haerre vianden viant soude wesen ende dat hi haerre wederpertye werderpertiech wesen soude: alsoe die wet seit.

27

Ende nader bedinghe namen si haer wapenen ende toghen vander stat: ende doe si biden vianden quamen so bleuen si legghen.

28

Ende ten eersten daghe als die sonne op ginc so vergaderderden beide die pertyen te stride. mer dese hadden tot enen hulper ende tot enen bescrmer den here: mer die ander hadden tot enen leitsman vanden strijt haren moet.

29

Mer doe den strijt anxteliken groot was. soe openbaerde den vianden vanden hemel vijf mannen te paerde. die schoen waren met gulden breidels:

30

ende die twee hadden mach-

[p. *644f]

abeo twisschen hem in haren wapenen. ende si hadden hem bewaert ende behouden onghequetst: ende si scoten inden vianden mit ghescut ende blixem. ende daer of worden si alle gheschent mit blindicheden ende veruolt mit anxt so dat si vielen.

31

Ende daer worter gedoot twintich dusent ende vijf hondert: ende ses hondert gheredenen.

32

Ende thimotheus die vloech in gazara die bewaerde stat ende daer was bouen cereas:

33

ende machabeus ende die mit hem waren beleiden die bewaerde stat vier daghen.

34

Ende die gheene die inden toerne waren om dat si hem verlieten op die vastheden vander stat soe vloecten sijse vtermaten seer: ende beroemden hem den quaden reden:

35

mer doe die vijfste dach op ghinc. so worden twintich iongelingen van dien die mit machabeo waren soe verwarmt van sinnen om die blasphemie ende toghen manlic ter muer. ende si toghen mit fellen moede an ende togen an die muer:

36

ende die ander ginghen op die toernen ende begonden die poerten te ontsteken. ende die versakers leuende te barnen.

37

Ende twee daghen doer woesten si die stat ende daer vonden sij thymotheum verborgen in een stat daer si hem gheborghen hadden: ende si sloghen hem doot ende sinen brueder ceream ende apollosanem sloghen si oec doot.

38

Als si dit ghedaen hadden: loefden si gode in dancke ende in belyen der groter dingen die hi dede in israhel: ende dat hi hem die victorie gaf.