Bible in duytsche (Delftse bijbel 1477)

Ca .ij

1

MEn vint in iheremias des propheten ghescriften: dat hi beual den genen die oueruoeren dat si vyer mit hem nemen souden alsoe voerseit is: ende hi ontboet den ghenen die ouergheuaren waren.

2

Ende gaf hem die wet

[p. *631]

dat si sheren gheboden niet vergeten en souden: ende dat si niet dolen en souden mit der herten als si sien souden die gulden afgoden ende silueren. ende haer ghewaden:

3

ende ander dusdanighe dinghen ende riet hem segghende dat sij die wette wt haren herten niet doen en souden

4

Want in dit gescrift was: hoe die propheet mit den ghebode dat hem god gaf beual den tabernakel ende die arcke mit hem te brenghen. tot dat hi wtgegaen was opten berch: daer moyses op ginc ende gods erfachticheit sach

5

Ende doe daer iheremias quam. vant hi daer een stat eenre speluncke: ende hi dede daer binnen die tabernacule ende die arcke ende den outare des wyeroecs ende hi vermaecte dat gat.

6

Ende enighe quamen toe die hem volchden om in die stat te trecken. Mer si en mochtense niet vinden.

7

Ende als iheremias dat vernam: soe versprac hijse ende seide. dat die stat onbekenlic sal wesen tot dat god vergaderen sal die vergaderinghe des volcx: dat hi guedertieren worden sal.

8

Ende dan sal die heer dese dinghen toghen: ende sijn moghentheit sal openbaren: ende een wolken sal wesen alsoe moyses vertoecht wort: ende alsoe doe salomon badt dat die plaetse gheheilicht soude worden den groten god dien dit vertoechde.

9

Ende doe hi na sijnre wijsheit offerde die offerhande die hi had van des tempels wyinghe ende sijnre volmaectheit.

10

Alsoe oec moyses ten heer bede: ende een vyer quam vanden hemel ende verbernde die holocaust.

11

ende moyses seide om dattet niet gesuuert en was omder sonden wille: soe verbrandet.

12

Ende salomon vierde oec achte daghen die wyinghe.

13

Want ditselue settemen in neemyas scriften ende gesten: ende om dat hij die bible maken woude so vergaderde hi vten lande die boken. vanden propheten ende den souter: ende der coninghen litteren ende van haren gesten.

14

Ende oec vergaderde iudas al dat hi gheleert hadde biden striden die ons gheuielen: ende sij sijn onder ons.

15

Daer om of gijt oec begheert te hebben: so sent die ghene diet v brenghen moghen.

16

Ende om dat wij die suueringhe vanden tempel doen sullen. so hebben wijt v gescreuen. Hier om so sul di wel doen: op dat gi dese dagen hout.

17

Want god die sijn volc verlost heeft ende sijn erfachticheit hem allen ghegeuen heeft. ende dat rijc ende die paepscap ende die heilicheit

18

so hi inder wet beloeft heeft: wi hopen dat hi onser cort ontfermen sal: ende vergaderen ons van onder alden hemel in die heilighe stat.

19

Want hi heeft ons verlost van groter vresen: ende heeft die stat gesuuert.

20

Mer van iudas machabeo ende sinen bruederen. ende vander suueringhe ende vanden groten tempel. ende vanden borch wyinghe:

21

ende oec vanden striden die behoren anthiochum die edele. ende eupater sinen soen:

22

ende vanden claerheden die gedaen waren vanden hemel totten ghenen die starckelic daden ouer den ioden: soe dat si al tlantscap wraken al waren si luttel. ende si verdreuen die menichten vanden heidenen:

23

ende verwonnen met alder herten den tempel die harde seer

[p. *632]

vermaert was. ende verlosten die stat so dat die wet weder ghemaect wort diemen alte broken soude hebben. om dat hem die heer mit alre guedertierenheit ghenadich wort:

24

ende oec hebben wi ons gepijnt te cortten in enen boec dat ioseph van syrenen in uwen boken gescreuen heeft.

25

Wat wi merken die menichte vanden boken ende die zwaerheit dier in sijn diet willen vertelen. die gesten vanden historien. ende om die menichte vanden dinghen

26

so hebben wij voersien den genen diet lesen willen dattet hem genoechlic wesen sal: ende dattet oec die naerstich sijn lichtelic onthouden sullen: ende dattet hem allen diet lesen sullen. profijt gheuen sal.

27

Want wij die dit werck ontfaen om te corten en hebben geen cleyn pijn anghegaen: mer een werc hebben wij anghenomen vol van wakinge ende van zweet.

28

Gelijc den ghenen die een werscap bereiden. ende soken der ander wille te doen: om veelre lude vrientscap so ghedogen wi gaerne die pijn.

29

Mer wi sullen die waerheit van elken scriuen: ende pinen ons nader materien die wi daer of hebben te corten.

30

Want gelijc een meester die een nyeu huys maken sal. ende al tmaecsel daer of besorghen moet: ende ghelijc een die pingeren sal moet ondersoken wat oerbaerlic is ter cyerheit: alsoe salment oec in ons wanen.

31

Want die verstandenis te vergaderen ende die reden te vercieren ende naerstelic alle dinc te ondersoken. dat behoert den scriuer vander historien toe:

32

mer die cortheit vander reden te volghen. ende te scuwen die vtinge vanden dinghen dat is hi sculdich te ontsculdighen die diet cort.

33

Hier sullen wi dat beghinnen te vertellen: mer vander voerreden is dit noch gheseit. Want tis sot voer die historie veel te spreken: ende vander historien weder of te corten