Bible in duytsche (Delftse bijbel 1477)

§ Capitel .I

[p. *629]

1

DIe ioden die bruederen die in iherosolima ende in iudea sijn. sij segghen saluut haren bruederen den ioden die binnen egipten sijn: ende gueden vrede.

2

God moet v wel doen. ende uwer ghedencken in sijnre geloften. Die hi gesproken heeft tot abraham isaac ende iacob sinen ghetrouwen knechten:

3

ende hi moet v allen therte gheuen dat ghij hem oeffenen moet: ende sinen wille doen mit groter herten ende mit willigen moede.

4

Hij moet v therte opluken in sijnre wet: ende gheboden: ende vrede maken.

5

Eude uwe ghebeden horen ende tot v luden waert worden geureet ende hij en moet v luden niet laten in quaden tiden.

6

Ende nv sijn wij hier biddende ouer v

7

Inden hondertsten ende negen ende tsestichsten iaer als demetrius regneerde. doe screuen wi ioden v luden in verdriete ende ende gheruchte dat op ons ghecomen is binnen desen iaren: van dier tijt dat iason wech toech vten heilighen lande. ende vten rijck.

8

So ontstaken si die poerten: ende storten onsculdich bluet wt Ende wi baden den heer ende worden verhoert: ende wi offerden sacrificie ende gewiet broot: ende wi ontsaken die lichtuaten ende leide die broden op die tafelen.

9

Ende nv hout die daghe der cenophegien inder maent casleu.

10

Inden hondertsten ende acht ende tachtichsten iaer. tvolc dat binnen iudea is ende iherosolimam ende douders ende iudas: aristobolo des conincs ptholomeus meester die vander consacreerder papen geslacht is ende den ioden die binnen egipten sijn: saluyt ende ghesontheit.

11

Wi die van groten vresen. van gode verlost sijn dancken wi grotelijc gode: als die gene die teghen enen so groten coninc gheoerloecht hebben.

12

Want hi dede krielen wt persen die ghene die teghen ons vechten souden. ende der heligher stat.

13

Want doen hi in persen selue leidsman was ende mit hem een ouertallich heer. so viel hi in naneen tempel: want hi wort mit nanee des papen rade bedroghen.

14

Want anthiochus ende sijn vrienden quamen te dier stat alle om mit hem te wanderen: ende om dat hij veel ghelts ontfaen soude inden naem van ghiften.

15

Ende doe nanee die paep tghelt ghewijst hadde ende anthiochus mit luttel luden gecomen was binnen den mueren vanden tempel: soe sloten sij den tempel.

16

Doe anthiochus daer binnen was ende si deden op den heimeliken ganc vanden tempel ende worpen stenen op hem ende doden. ende die ghene die mit hem waren: ende sloghense van lede te lede in stucken: ende sloghen hem die hoefden of ende worpense daer buyten.

17

Ouer al moet god ghebenedijt wesen: die die quade verderfde.

18

Wij die die suueringhe vanden tempel doen sullen opten vijf ende twintichsten dach vander maent casleu. ons docht noot dat wi v dat te weten daden: om dat gij oec doen sult den dach der cenophegien ende den dach des viers: dat ghegheuen was doe den tempel ende outaer ghe-

[p. *630]

sticht was van neemias.

19

Want doe onse vaderen in persen gheleet waren die papen die doe des gods soens oeffenaren waren. ende si nament vyer vten outaer ende berchdent heymelic in een valeye daer enen diepen ende drogen put was: ende si bedectent daer binnen. so wel dat nyemant die stat weten en soude.

20

Ende doe veel iaren ouerleden waren ende het god genoechde dattie coninc van persen neemiam sende: die der papen neue was ende tvyer gheborghen hadde so sende hine om te soken: ende alsoe si ons vertelden soe en vonden si geen vier mer dicke water.

21

Ende hi beual hem dat sijs sceppen souden. ende hem bringen: ende neemyas beual die sacrificien die opten outaer geleit waren mitten water te bestortten: ende thout: ende datter op lach.

22

Ende men dede soe. ende doe die tijt quam dattie sonne scheen die te voren verdonckert was: soe ontstac een groot vyer soe dat si alle verwonderden.

23

Ende alle die papen deden ghebede ende die sacrificie brande. ende ionathas begonde: ende die ander antwoerden.

24

Ende neemyas bedinge was in deser manieren. Heer god scepper van allen dinghen veruaerlic ende starc gherechtich ende ontfermhertich die alleen bist guede coninc:

25

alleen verlenende alleen gerechtich ende ontfermhertich almachtich ende ewich. die israhel verlost van allen quade: die die vaderen maecste wtuercoren ende heilichdese:

26

ontfaet dese sacrificie ende dijn volc van israhel. ende behoede dijn deel in heilicheit.

27

Vergader onse ghespreetheit: ende verlost die den heidenen dienen. ansich die versmaet ende veronwaert sijn: dat die heiden mogen weten. dattu biste die heer onse god.

28

Quelse die ons tonderdoen ende ouerdaet doen in houverdien.

29

Set dijn volc inde heilige stat: so moyses seide.

30

Ende die papen songhen lof: tot alle die sacrificie verbrant was.

31

Ende doe die sacrificie verteert was: soe beual neemyas datmen die meerre steen begieten soude mitten water datter ouerghebleuen was.

32

Ende doet ghedaen was: soe quammer een vlamme wt: mer sij wort verteert vanden lichte dat vten outaer sceen

33

Ende doe dese dinghen geopenbaert waren: so wort dat den coninc van persen gheseit dat in die stat daer die papen ouergheuoert waren ende tvier verborgen hadden. water in geuonden was: daer neemyas ende die mit hem waren die sacrificie mede ghesuuert hadden.

34

Ende als die coninc dit mercte ende dat naerstelic ondersocht. soe maecte hi hem enen tempel dat hi weten soude dat daer ghedaen was.

35

Ende doe hi dat wiste: gaf hij den papen veel guets ende ander giften: ende hadde die coninc erghent yet gegheuen hi ontfinc weder daer of. veel ghelts ende ghiften.

36

Ende neemyas hete dese stat nephtar dats suueringe. Ende onder veel luden hetese nephi