Bible in duytsche (Delftse bijbel 1477)

§ Capitel xiij.

1

SYmon hoerde dat triphon een groot heer vergaderde. om te comen in tlant van iuda ende om dat te bernen

2

ende om dat hij sach dattet volc in anxt ende in vresen was. soe toech hi op te iherusalem ende vergaderde tvolc:

3

ende riet hem ende seide. Ghi weet wat striden ic ende mijn brueders ende mijns vaders huys gedaen hebben: om die wet ende om die heylighen: ende dat verdriet dat wi ghesien hebben.

4

Om dese sake sijn alle mijn brueders doot ghebluen om israhels wille: ende ic bin alleen ouer bleuen.

5

Ende nv en hoert mi mijn ziel niet te sparen: in alle den tijt van verdriete. Want ic en bin niet beter dan mijn bruederen:

6

ende hier om sal ic mijn volc wreken ende die heylighen. ende onse wiuen ende onse kinderen: want alle die heyden sijn vergadert om ons te verderuen van viantscap.

7

Ende doe dat volc dese reden hoerden. so wort haren geest verwarmt: ende antwoerden mit luder stemmen ende seiden.

8

Du biste onse leidsman in die stede van iuda. ende in ionathas dijns brueders stat

9

Vecht onse stride: ende wi sullen doen al dattu ons segghen sultste.

10

Ende hij vergaderde alle die mannen die vechters ende haeste hem te volmaken die muer van iherusalem: ende hij verwaerdet al om ende omme.

11

Ende hi sende ionathas absolomi soen ende mit hem enen nyeuwen heer in ioppen: ende verdreeffer wt dier binnen waren inden burch ende bleeffer self binnen.

12

ende triphon porrede mit enen groten heer van ptholomayden. om te comen in tlant van iuda: ende ionaths was mit hem in hoede.

13

Ende symon toech in addis teghen dat aensichte vanden tempel.

14

Ende doe

[p. *621]

triphon vernam dat symon opgheresen was in die stede van ionathan sinen brueder. ende want hi teghen hem striden soude: doe sende hi legaten tot hem ende seide.

15

Wi hebben ionathan dinen brueder gehouden ouer tsiluer dat hi sculdich was in des conincs rekeninge.

16

Ende nv so sende ons hondert talenten siluers ende beide sijn sonen te ghijzel: dat hij ons niet en ontulie als wi hem laten gaen: ende wij sullene v weder senden.

17

Ende symon verstont dit. dat hijt mit boesheden seide. Nochtan beual hij tsiluer ende die kinder te geuen: om dat hi gene grote viantscip beiaghen en woude anden volc van israhel die segghen souden:

18

om dat hi dat siluer ende die kinder niet en sende. so is hi ghedoot.

19

Ende hi sende die kinder ende hondert talenten siluers. Ende triphon loech: ende en liet ionathas noch niet gaen.

20

Ende hier na quam triphon binnen den lantscapen. omme dat hijt destrueren soude: ende sij toghen omme alle dien wech die leit te ador waert. Ende symon ende sijn heer. toghen telker stat daer si ginghen.

21

Ende die inden borch waren. senden te triphon boden. dat hi hem haeste doer die wildernissen te comen: ende dat hi hem prouancien soude.

22

Ende triphon ghereide alle die geredenen: dat hi binnen dier nacht comen soude. Want twas harde veel snees: ende hi quam in galaad niet

23

Ende doe hi te baschamam gecomen was: so dode hi ionathas ende sijn sonen

24

Ende triphon keerde hem omme: ende toech wech in sijn lant.

25

Ende symon sende ende nam ionathas sijns brueders gebeente: ende groeffen in modyn in sijnre vader graf stat.

26

Ende al israhel weenden. mit groten gheween: ende bescreiden hem veel daghen.

27

Ende symon stichte op sijns vaders graft ende sinre bruederen een hoech ghetimmert van aensien. mit behouwenen stenen van achter te voren:

28

ende hi settede seuen columpnen deen teghen dander: sinen vader ende sijn moeder. ende sijnen vier bruederen.

29

Ende hi sette hier om grote columnen: ende op die columpnen haer wapene ghesneden tot een ewich ghedenckenisse. ende bi die wapenen wtghesneden scepen: dien die lude zien die inder zee varen.

30

Dit ist tgraf dat hi in modin makede tot in desen daghe.

31

Ende doe triphon wech voer mit den ionghelinc anthiocho den coninc. so dode hine valschelijc: ende hi regneerde in sijn stede.

32

Ende hi sette op sijn hoeft die croen van asien: ende hij dede doe grote scade int lant.

33

Ende symon stichte die verwaringhe int lant van iudea: ende hi verwaerdese mit hoghen toernen. ende mit groten muren ende mit poerten ende sloten ende leide vitalie in desen steden.

34

Ende symon coes mannen wt ende sendze tot demetrium den coninc. dat hij tlantscap vri houden soude van tributen: want alle triphons daden waren gedaen bi beroeuen.

35

Ende die coninc demetrius antwoerde hier toe: ende screef dusdanighe litteren.

36

Demetrius den coninc ende symon den hoghen paep ende des coninghen vrient: ende den ouders ende den volc vanden ioden saluut.

37

Die gulden croen.

[p. *622]

ende die gulden halsbant die ghi gesent hebt die hebben wi ontfaen: ende wij sijn ghereet mit v te maken groten vrede: ende te scriuen des conincs princen dat si verlaten dat wij v ghegheuen hebben

38

Ende so wat wi v ghegheuen hebben bliue uwe. Ende die vaste steden die ghi gemaect hebt bliuen uwe

39

Wi vergeuen v oec alle roeckeloesheit ende sonden. tot in desen daghe toe. ende die crone die ghi sculdich waert. Ende wat dat anders was onder tribuyt in iherusalem: dat en sal uv gheen tribuyt wesen.

40

Ende sijn enighe onder v luden die tamelic sijn te scriuen onder die onse men selse daer onder scriuen: ende tusschen ons si vrede.

41

Inden hondertsten ende tseuentichsten iaer nae den tijt van griecken: soe wort der heidenen macht ghenomen van israhel.

42

Ende tvolc begonde doe te scriuen in tafelen in haren openbaren brieuen die si maecten: int eerste iaer onder symon den groten paep ende leitsman ende den princeu van iudea.

43

In dien daghe toech symon te gazam. ende hi omleidet mit heeren. ende maecte machinen: ende toech ter stat waert. ende hi sloech enen toren: ende wan hem.

44

Ende die daer in braken. waren tusschen een machine ende der stat: ende inder stat wort groot gerucht

45

Ende die ghene die inder stat waren ginghen op den muer mit haer wiuen ende mit kinderen ende mit ghescoerden clederen: ende riepen mit luder stemmen ende sy eyschten symon dat hi hem vrede gaue:

46

ende seiden. En ghelde ons niet na onser boesheit. mer nae dijnre ontfermherticheit: ende wi sullen di dienen.

47

Ende symon wort gheneyget tot ontfermherticheit. ende en vervachtese niet: mer hi verdreefse vter stat. ende hi suuerde die huysen daer die afgoden in gheweest hadden: dan ginc hij daer binnen mit loue den heer ghebenediende.

48

Ende doe alle onsuuerheit vter stat gheworpen was. soe leide hi mannen daer binnen die de wet houden souden ende hi verwaerdese:ende maectse tot eenre woninghe tsijnre behoef.

49

Ende men lietse niet wttrecken die inden borch van iherusalem waren ende die in tlantscap te varen pleghen. ende men en lietse copen noch vercopen: ende si hadden groten honger: ende veel van haer starfer van hongher.

50

Ende sij riepen an symon dat si vrede ontfangen wouden: ende hi gaf hem vrede Ende dreefse daer wt. ende suuerde die borch vander onsuuerheit.

51

Ende si ghinghen daer in. opten drie ende twintichsten dach vander ander maent. inden hondertsten iaer ende een ende tseuentichsten mit loue ende mit telgheren van palmen ende met herpen ende mit cymbalen ende mit sanctorien ende loue ende sange: om dat die grote viant van israhel tondergedaen was

52

Ende hi ordineerde datmen alle iaer dese daghen houden soude mit blijscapen.

53

ende hi verwaerde dien berch vanden tempel. die biden borch was. ende daer so woende hi selue. ende die mit hem waren

54

Ende symon sach ian sinen soen dat hij een starc man wesen soude: ende hi maecten maerscalc van alle der macht: ende hi woende in gazam