Bible in duytsche (Delftse bijbel 1477)

§ Ca .xij

1

ENde ionathas sach dat hem die tijt halp: ende hi coes mannen wt: ende sendese te romen te setten ende te vernyewen die vrientscap mit hem.

2

Ende hi sende oec na dese manier litte-

[p. *618]

ren tot sparciaten. ende ten anderen steden.

3

Ende si toghen wech te romen: ende si qauamen in thof ende seiden. Ionathas die hoghe paep ende tvolc vanden ioden hebben ons tot v gesent: dat ghi met ons vernyeuwet die vrientscap ende geselscap nae dat die te voren was.

4

Ende si gauen hem litteren ten volke tallen steden: dat sijse mit vreden gheleiden souden tot in tlant van iuda.

5

Ende dit is die exempel vander litteren die ionathas die sparciaten sende

6

Ionathas die hoechste paep ende die ouders vanden volc. ende die papen. ende dat ander volc vanden ioden. onsen brueders den sparciaten salnut.

7

Hier voertijts waren ghesent litteren tot onyam den hogen paep van dario die bi v regneerde: want ghi onse brueders sijt: so dat wederscrift hout datter volcht.

8

Ende onyas ontfenc den man mit eren dier ghesent was: ende hi ontfenc die litteren daer in ghescreuen was vander geselscap ende vrientscap.

9

Ende al en hadden wij des niet te doen om dat wi te solaes hebben die heilighe boken die in onsen handen sijn:

10

soe wouden wi an v nochtans senden om vrientscap ende om bruederscap te vernyeuwen: om dat wi van v niet verureemt en worden. Want veel tiden sijn geleden van diertijt dat ghi tot ons sendet.

11

Want in allen tiden sonder achterlaten. inden feesteliken daghen ende inden anderen tiden daers te doen is. so ghedencken wi uwes inden offerhanden die wi offeren ende in die bewaernisse: soe dat recht is ende betaemt. der brueder te ghedencken

12

Want wi verbliden van uwer glorien

13

Mer ons hebben beuaen veel tribulacien ende striden: ende die coningen die al om ende om ons sijn hebben ons bestreden.

14

Mer wi en willen v niet quader tieren wesen: noch onsen anderen vrienden ende ghesellen in desen striden.

15

Want wi hadden salcoers vanden hemel: ende wi sijn verlost: ende onse vianden sijn veroetmoedicht.

16

Ende hier om hebben wi wtghecoren numenium anthiochus sone ende antipatrem iasons sone. ende wi hebbense ghesent tot die van romen waert om te vernyeuwen die eerste vrientscap ende gheselscap.

17

Ende hebben oec beuolen dat si tot v comen ende v grueten: ende dat si v onse litteren gheuen vanden vernyeuwen ons bruederscaps.

18

Ende ghi sult wel doen antwoerdende ons op dit.

19

Ende dit is dat wederscrift vanden litteren: die onyas sende.

20

Den coninc vanden spartciaten sent onyas ionathas den groten paep saluut

21

Men heeft geuonden inder scriftuer vanden sparciaten ende den ioden dat sij brueders sijn: ende dat si van abrahams geslachte sijn

22

Ende nv om dat wij dat weten: soe doe di wel ons scriuende van uwen vrede.

23

Mer wi hebben v oec wederghescreuen. Onse vye ende onse possessien sijn uwe: ende die uwe onse. Ende wij ontbieden datmen dit v doet weten

24

Ende ionathas verhoerde dat demetrius princen wtgetogen waren mit veel meer heers dan si te voren plaghen. om teghen hem te vechten:

25

ende si togen wt iherusalem: ende hi quam hem teghen in tlantscap van amathiten. Want hij en

[p. *619]

had hem so veel termijns niet gegheuen dat sij binnen sinen lande comen mochten.

26

Ende hij sende verspiers in haren ghetelden: ende doe die wederghecomen waren seiden si sat sij des nachts micten op hem te comen.

27

Ende doe die sonne ondergegaen was. so beual ionathas den sinen te waken: ende alden nacht ghereet te sijn in die wapen om te striden Ende hi leide wachters al om die ghetelde.

28

Ende die vianden vernamen dat ionathas ende die sine ghereet waren te striden: ende sij ontsaghen hem ende hadden anxt in al haer herte: ende si ontstaken vyer in haren tenten. ende si vlogen.

29

Mer ionathas ende die mit hem waren en wistent niet voer smorgens vroech. Want si saghen dat vyer bernen:

30

ende ionthas die volchde hem na: mer hi en onderhaeldze niet. Want si waren leden ouer die riuier eleutherum.

31

Ende ionathas keerde hem te dien van arabien waert diemen heet zabadei: ende hij sloechse ende nam haren roef Ende vencse.

32

ende hi quam tot damasco: ende doerwanderde alle dat lantscap.

33

Ende symon toech wt. ende quam te ascalon ende ten vasten steden daer omtrent: ende hi toech neder tot ioppen: ende beleidet.

34

Want hi had vernomen dat si demetrius pertye hulp doen wouden: ende hi leide daer wachters: diet hueden souden.

35

Ende ionathas keerde weder ende vergaderde die ouders vanden volke: ende pensde mit hem luden te stichten die vaste steden in iudea:

36

ende die mueren van iherusalem te hogen: ende een grote hoechte te maken in die middewaert vanden borch. ende om die borch vander stat te scheiden. omme dat si alleen wesen souden: ende so dat sij niet en souden copen noch vercopen.

37

Ende si vergaderden om die stat te stichten: ende die mueren opter riuier die vielen: ter sonnen opganghe waert. ende hi maecte die muer diemen capheteta hete

38

Ende symon stichte adyadam in sephala. ende hi beuredet ende hincker poorten an ende sloten.

39

Ende tryphon wort pensende om bouen azien te regneren. ende dat hij die crone nemen soude. ende om anthiochum den coninc te doden:

40

mer om dat hi hem ontsach dat hem dat ionathas niet en soude ghedoghen. mer dat hi tegen hem soude moeten striden: soe socht hi hoe hi ionathas soude mogen vaen ende doden Ende hi stont op ende toech wech in bethasan.

41

Ende ionathas toech wt hem te ontmoeten mit veertich dusent mannen wtghecoren ten stride: ende hi quam te bethasan.

42

Ende tryphon die sach dat hij mit enen groten heer ghecomen was. ende hi en dorste die hande an hem niet slaen: ende hi ontsach hem.

43

Ende ontfinc hem mit groter eren: ende beual hem alle sijnen vrienden: ende gaf hem grote giften. Ende hi beual sinen heeren dat si ionatham onderdaen waren ghelijc hem seluen.

44

Ende hi seide te ionathan Waer om hebtste al dit volc ghemoeyt: als wi ghene strijt en hebben?

45

Ende sentse weder thuys. Mer kies du een luttel mannen wt die mit di wesen mogen: ende coem mit mi te ptholomayden. ende ic salt di leueren: ende die an-

[p. *620]

der steden. ende een heer ende alle die prouoesten vanden lande: ende ic sal wederkeren ende wech trecken. Want hier om bin ic ghecomen.

46

Ende ionathas gheloefde hem: ende dede so hi hem seide ende lietet heer wech gaen: ende si togen in tlant van iuda.

47

Mer hi hielt mit hem drie dusent mannen: ende daer of sende hi den twee dusent in galilea: ende mit hem toecher dusent.

48

Ende als ionathas binnen ptolomayden ghecomen was. so sloten die vander stat haer poorten. ende vingen ionathan: ende alle die mit hem daer binnen ghecomen waren. sloghen si doot mitten zwaerde.

49

Ende triphon sende een heer in galilea ende in die grote velden: dat si alle ionathas ghesellen doden souden.

50

Mer doe die vernamen dat ionathas gheuanghen was ende dat hij verderft was. ende alle die mit hem waren: soe rieden si deen den anderen. ende si togen wt bereet te stride.

51

Ende doe die ghene saghen die hem gheuolcht waren dat dese haer lijf auentueren wouden so keerden si weder:

52

ende dese quamen alle mit vreden in tlant van iuda. Ende si beweenden ionathan seer: ende alle die mit hem waren. Ende israhel weende mit groten geween.

53

Ende alle die heiden al omme ende omme sochtense te verderuen. want si seiden

54

Si en hebben te hant genen prince noch hulpe: daer om laetse ons nv tonder doen: ende laet ons haer ghedencken nemen van allen menschen