Bible in duytsche (Delftse bijbel 1477)

§ Ca .viij

1

ENde iudas hoerde van die van romen dat si machtich waren van cracht. ende dat si haren wille doen te al dien datmen van hem eyscht: ende so wie dat an hem quaem dat sij mit hem vrientscap maecten: ende want si mogende waren van macht.

2

Ende si hoerden haer striden ende haer goede macht dien si deden in gallacien: want sijse verwonnen ende dedense onder trybaut.

3

Ende hoe grote dinghen si daden in trijc van spaengen: ende dat si alle metael van gouden ende van siluer in hare macht hadden die daer sijn:

4

ende dat si alle die steden besaten mit haren rade ende met haer ghehoersaemheit: die steden die herde veer van hem waren. ende hoe sij die coninghen tonderghedaen hebben die op hem gecomen waren vanden eynde der werelt: ende si sloghense mit groter plaghen. Mer dander geuen hem alle iaer tribuut.

5

Ende sij deden tonder in stride philips den coninc van persen ende dander die teghen hem wapen droghen ende si bleuen te bouen.

6

Ende den groten anthiochum den coninc van azien die op hem vacht. Ende die hadde hondert ende twintich elyphanten ende geredenen ende wagenen ende een herde groten heer hoe dat sine verwonnen.

7

ende want si hem vingen leuende ende si setten hem dat hi ende die gene die na hem regneren soude dat hi hem gheuen souden groot tribuut: ende dat hi gisel geuen most ende dat hem geset was Ende tlantscap van meden ende die van lyden ende van meden ende van haren besten lantscappen:

8

ende doe sijt van hem luden ontfanghen hadden. doe gauen sijt eumeni den coninc

9

Ende want die gene die waren te elladam wouden gaen ende nemense hem: ende sij vernament

10

ende senden te hem enen prince. ende vochten teghen hem ende het vielre veel van hem luden: ende si leiden dier wiuen ende kinder mit hem gheuaen ende si beroefdense ende besaten haer lant: ende destrueerden haer mueren: ende dedense tonder te dienst lude tot in desen daghe.

11

Ende die ander riken ende die eylanden die sulcke tijt teghen hem staken. die destrueerden si: ende dedendse onder haer machte.

12

Ende mit haren vrienden ende die vrientscap mit hem hadden daer hielden si vrentscap mede: ende si behielden die riken die bi ende verre waren: want soe wie haren naem hoerde si ontsagense.

13

Ende wien si te helpe wesen wouden dat si regneren souden. die regneerden. Ende die si wouden namen si dat rijc: ende sij waren seer verheuen.

14

Ende in alle dese en droech nyemant croen: noch en clede hem mit purpur: dat hi daer in ver-

[p. *606]

uen wesen soude.

15

Ende want sij een hof gemaect hadden: ende dagelics hadden si raet mit drie hondert ende twintich mannen. ende deden altoes der meester menichten raet: om dat si doen souden dat gerecht was.

16

Ende elcs iaers beualen si enen man die meesterscap dat hi bouen alle der werelt regneren soude dan: ende si waren dien al euen ghehoersaem: ende onder hem en was haet noch nijt.

17

Ende iudas coes wt eupolenium ians sone die iacobs sone was ende iazonen eleazars soen ende hi sende die te romen om mit hem luden te maken gheselscap ende paeys:

18

ende dat sij van hem luden doen souden der griexer bedwanc. want si sagen dat si trijc van israhel tonder doen souden in dienste.

19

Ende si togen wech te romen waert harde veel weghes: ende ghinghen in thof ende seiden.

20

Iudas machabeus ende sijn bruederen ende die ioden hebben ons tot v ghesent om mit v gheselscap te maken ende vrede: datmen ons scriuen sal uwe vrienden ende ghesellen.

21

Ende dese redenen genoechde hem in haeren aenscouwen.

22

Ende dit ist wederscriuen dat si ons wederscreuen in een coperen tafel: ende sondense in iherusalem om datter een ghedencken wesen soude des vreden ende gheselscaps

23

Ewelic moet wel wesen die van romen ende den ioetschen volc inder zee ende op tlant: ende tzwaert ende die vianden moeten verre van hem wesen

24

Coemt die van romen eerst strijt an of alle haren ghesellen in alle haerre heerscappien:

25

dan sal tvolc vanden ioden salcoers brengen mit volmaecter herten alsoe die tijt eyschen sal.

26

Ende sij en sullen den ghenen die te stride comen niet geuen noch voersien mit tarwe noch wapene noch ghelt noch scepe alsoet die van romen ghenoget: ende sij sullen houden datmen hem beuelen sal ende niet van hem ontfaen.

27

Oec ist datten volc vanden ioden eerst strijt gheualt. so sullen hem die van romen helpen mit herten alsoet die tijt eyscht:

28

ende den ghenen die hem helpen. en sullen si niet gheuen tarwe noch wapen noch ghelt noch scepen alsoet die van romen ghenoecht: ende si sullen haer gheboden wachten sonder loesheit.

29

Nae deser woerden soe setten die van romen den volc vanden ioden

30

Mer geualtet na desen woerden dat dese of die gene na desen toe doen ofte ofdoen willen. dat sullen si doen wt haer selfs opset: ende alle dat sy daer of doen ofte toe doen dat sal vast wesen

31

Mer vanden quaden datten coninc demetrius teghen hem ghedaen heeft soe hebben wi hem ghescreuen ende geseit. Waer om hebstu dinen dienst verzwaert op den ioden onse vrienden ende onse ghesellen?

32

Daer om geualtet dat si wedercomen ons claghen ende dat ouer di. soe sullen wi hem den vonnisse doen: ende dan mitti vechten ter zee ende ten lande.