Bible in duytsche (Delftse bijbel 1477)

§ Capit .vij

1

INden hondertsten ende een ende vijftichsten iaer soe quam demetrius seleucus soen van romen: ende toech met luttel luden inden steden vander zee: ende hi regneerde daer.

2

Ende het geuiel doe hi gecomen was in thuus van sijns

[p. *603]

vaders rijc. soe ving theer anthiochum ende lysiam om dat sijse demetrium brenghen souden:

3

ende hi vernamt ende seide. En toget mi haer aensicht niet

4

Ende theer doodse daer. Ende demetrius sat opten troen van sinen rike.

5

Ende quade ongherechtighe mannen quamen wt israhel tot hem. ende alchimus was haer leidsman: die biscop warden woude.

6

Ende si wroechden voerden coninc ende seiden. Iudas ende sijn bruederen hebben des conincs vrienden verderft: ende heeft ons verdreuen van onscn lande.

7

Daer om sende nu enen man dien du gheloefste dat hi gaen mach ende besien alle die verderfnis dat hi ons ende des conincs lantscappen gedaen heeft: ende hi heeft alle des conincs vrienden ende hulpers ghecranct.

8

Ende die coninc coes wt sinen vrienden bachidem die prince was ouer die grote riuier int rijc die den coninc getrouwe was:

9

ende hi sende hem om te sien die ouerdaet die iudas ghedaen hadde. Ende den quaden alchimum gaf hi dat paepscap: ende beual hem wraec te doen inden kinderen van israhel.

10

Ende sij stonden op ende quamen mit enen groten heer in tlant van iuda ende senden boden ende spraken tot iudas ende sinen brueders vriendelike woerden in boesheden:

11

ende si en hilden hem an haer woerden niet. Want si saghen dat si ghecomen waren mit alten groten heer:

12

ende die vergaderinghe vanden scriben vergaderden tot alchimum ende bachidem om te soken dat gherecht was

13

Ende eerst die wederstaenres der oeffeninghen gods die onder die kinder van israhel waren: ende si sochten van hem vrede.

14

Want si seiden. Een man een paep die van aarons sade comt: hij en sal ons niet bedriegen.

15

Ende hi sprac mit hem vredelike woerden: ende zwoer hem ende seide. Wij en sullen v gheen quaetheit doen: noch uwen vrienden.

16

Ende si gheloefdent hem. Ende hij begreep van hem luden tsestich mannen: ende doedse in enen daghe na twoert dat gescreuen is.

17

Dijnre heiligen vleisch ende bluet storten si wt omtrent iherusalem. ende nyemant en was diese groof.

18

Ende anxt ende vrese viel in al tvolc: ende sij seiden Waerheit ende vonnisse en is in hem niet. Want si hebben te broken dat si beloefden: ende den eedt die si zworen

19

Ende bachides ruerde ghetelden te iherusalem waert ende voechdese in bethzecha. Ende hi sender ende vincker veel die van hem gheuloghen waren: ende hi dode enighe vanden volke: ende warpse in enen groten put.

20

Ende hi beual alchimo dat lantscap: ende liet mit hem salcoers te sijnre hulpe. Ende bachides toech wech totten coninc.

21

Ende alchimus dede genoech voer om dat hi prince vanden papen was.

22

Ende tot hem vergaderden alle die haer volc verstoerden: ende si behilden tlant van iuda: ende daden grote plage in israhel.

23

Ende iudas sach al tquaet dat alchimus dede ende die mit hem waren der kinder van israhel veel meer dan der heyden

24

ende hij ghinc wt in al tlant van iuda al omme ende hij dede wrake in die ondadighe mannen: ende si hielden op voertmeer wt te trecken in tlant.

25

Ende alchimus

[p. *604]

sach dat iudas ende die mit hem waren te bouen worden. ende hi bekende dat hijse niet en mochte ghedoghen: ende hij keerde weder totten coninc: ende hij wroechdse mit veel misdaden.

26

Ende die coninc sende nichanor een van sinen edelsten princen: die altoes viantscap maecte teghen israhel: ende hij beual hem tvolc te niet te maken.

27

Ende nychanor quam mit enen groten heer in iherusalem: ende sende tot iudam ende sinen brueders mit vredelike woerden in boesheden ende seide

28

Ghenen strijt en sal wesen tusschen v ende mi Ik sal comen mit luttel mannen: ende sien v aensicht mit vreden.

29

Ende hi quam tot iudam ende si grueten deen den anderen vriendelic: ende die vianden waren bereet om iudam te vaen.

30

Ende iudas vernam dit dat hi mit boesheden tot hem ghecomen was: ende wort veruaert van hem: ende en woude sijn aensicht niet sien nemmermeer.

31

Ende nychanor sach dat sijnen raet ondect was: doe toech hij wt iudam te ontmoeten om mit hem te striden neuen capharsalama.

32

Ende van nychanors pertyen so vielen wel na vijf dusent mannen: ende si vlogen in dauids stat.

33

Ende nae dese woerden toech nychanor op den berch van syon: ende van des volcs papen ginghen wt ende grueten hem in vreden: ende toechden hem die holocaust diemen offerde ouer den coninc:

34

ende bespottende so veronwaerdense ende besmettense die offerhande. ende hi sprac houaerdelic:

35

ende zwoer mit gramscappen ende seide Ten si dat mi iudas ende sijn heer gheleuert wort in mijn hant: als ic wederkeren sal in vreden soe sal ic dit huys verbernen. Ende hi ghing wt mit groter gramscepen.

36

Ende die papen ghinghen ende stonden voerden outaer inden tempel ende seiden al wenende.

37

Heer du hebste dit huys vercoren. om dinen naem daer in aen te ropen: om dattet wesen soude een bede huys dijns volcs.

38

Doet wraeck in desen man. ende in sijn heer dat si vallen mit den zwaerde. Gedenc haer blasphemien: ende en gif hem niet dat si gheduerich bliuen.

39

Ende nychanor toech van iherusalem ende voer met sinen heer voer bethoron: ende hem quam toe theer van syrien.

40

Ende iudas toech in adersa mit sinen drie dusent mannen. Ende iudas bede ende seide.

41

Heer die ghesent waren vanden coninc sennacherib om dat si di blasphemeerden. so quam een enghel ende versloech van dien luden hondert dusent ende vijf ende tachtich dusent mannen:

42

alsoe doe du heer huden tonder in onsen aenscouwen ende die ander sullen weten dat hi qualic gespreken heeft op dinen heilighen ende vonnisse hem nae sine qaetheit.

43

Ende inden dertiensten dach vander maent adar soe streden sij: ende nychanors heer ginc tonder: ende hij viel eerst inde strijt.

44

Ende doe nychanors heer sach dat hi gheuallen was soe worpen sij haer wapen wech ende si vloghen:

45

ende sij volchden hem na den wech eens dages van adazer tot datmen comt te gazara: ende si tromten mit trompen achter hem mit beteykeninghen.

46

Ende sij toghen wt al omme ende omme wt allen steden

[p. *605]

ende si bliesense wech mit hoernen: ende si keerden weder tot hem. Ende vielen alle mitten zwaerde: ende van hem en bleefer een niet.

47

Ende si namen hem haren roef: ende sloghen nychanor thooft of ende sijn rechterhant die hi houaerdelic opgheheuen hadde: ende die droghense ende henghense voer iherusalem.

48

Ende tvolc verblide seer: ende sij hielden dien dach mit groter blijscappen

49

Ende iudas ordineerde datmen dien dach alle iaer houden soude opten dertiensten dach vander maent ader:

50

ende tlant van iuda rustede een luttl dagen.