Bible in duytsche (Delftse bijbel 1477)

§ Capitel .iiij.

1

WAnt siet die dach sal comen ontsteken als een scoersteen: ende alle die houaerdige ende alle die boesheit doen sullen sijn als een stoppel. Ende die dach comende salse ontsteken seit die here der scaren: die hem niet laten en sal wortel ende vrucht.

2

Ende die sonne der rechtuaerdicheit sal v opgaen die ontsiet mijnen naem: ende gesontheit in sijnen vederen. Ende gi sult wtgaen ende springhen als calueren van die vergaderinghe der beesten:

3

ende sult treden die boesen wanneer si sullen sijn als asch ondert hol uwer voeten inden dach in welken ic doe seit die here der scaren.

4

Gedenct der wet moysi mijns knechts: die ic hem geboden heb in oreb tot al israhel. die geboden ende oerdelen.

5

Siet ic sal v senden helyam den propheet: eer die grote ende veruaerlike dach des heren sal comen.

6

Ende sal bekeren thert der vaderen totten sonen: ende thert der sonen tot horen vaderen: op dat ic niet bi auenturen en sal comen ende slaen die aerde mit maledictie.

§ Hier eyndt die propheet malachias

Deese ieghenwoerdighe bible mit horen boecken. ende elc boeck mit alle sijne capitelen. bi enen notabelen meester wel ouergheset wt den latine in duytsche ende wel naerstelic gecorrigeert ende wel ghespelt: was gemaect te delf in hollant mitter hulpen gods ende bij ons iacob iacobs soen ende mauricius yemants zoen van middelborch ter eeren gods. ende tot stichticheit ende lerijnghe der kersten ghelouighen menschen. Ende wort voleynd. int iaer der incarnacien ons heren duysent vier hondert zeuen ende tseuentich. den thienden dach der maent ianuario