Bible in duytsche (Delftse bijbel 1477)

§ Ca .iij.

1

SIet ic sal senden mijnen engel: ende hi sal bereiden den wech voer mijn aensicht. Ende te hant sal coemen die here tot sijnen tempel die ghi soect. ende die enghel des testaments die ghi begheert. Die here der scaren seit: siet hi coemt.

2

Ende wie sal moghen dencken den dach sijns toecomstes? Ende wie sal staen om hem te sien? Want hi sal sijn als vier te samen blasende: ende als cruyt des volres.

3

Ende hi sal sitten te samen blasende. Ende reynmakende tsiluer: ende hij sal purgeren die sonen leui. Ende hij salse cleynsen als gout ende als siluer: ende si sullen offeren den here sacrificien in rechtuaerdicheit.

4

Ende die offerhande van iuda ende iherusalem sal den here behaghen als dagen des ewicheits: ende als die oude iaren

5

Ende ic sal toegaen tot v int oerdel: ende sal sijn een snel getuych den quaden ende ouerspeelrers ende den meenedighen: ende die veronrechten dat loen des huyrlincs: ende die vernederen die weduwen ende weesen ende verdrucken den vreemden: noch en hebben mi niet ontsien dit seit die here der scaren

6

Want ic bin die here ende en worde niet verwandelt: ende ghi sonen van iacob en sijt niet vertrert.

7

Want vanden dagen uwen vaderen sidi wech ghegaen van mijnen wetten: ende en hebtse niet bewaert. Die here der scaren seit: keert weder tot mij ende ic sal weder keren tot v. Ende ghi hebt gheseit. Waer in sullen wi weder keren?

8

Of een mensch god sal castien: want ghi mi doersteect. Ende ghi hebt gheseit. Waer in hebben wi dij doersteken? In thienden ende inden eersten vruchten ende in armoede.

9

Ghi sijt vermaledijt: ende ghi gheheel volc doersteect mi.

10

Indraecht alle thiende in die scuyer: ende het sal sijn spise in mijn huys: ende proeft mi op dat. dit seit die here. Of ic v niet opdoen en sal die cloeuen des hemels: ende wtstorten v benedyinghe tot oueruloedicheit.

11

Ende ic sal voer v berispen den verslinder: ende hi en sal niet verderuen die vrucht uwer aerden: noch die wijngaert en sal niet onvruchtbaer sijn inden acker dit seit die here der scaren.

12

Ende alle volcken sullen v heilich seggen. Want die here der scaren seit: ghi sult sijn een begheerlike aerde.

13

Die here seit uwe woerden sijn sterc gheworden op mij

14

Ende ghi hebt gheseit. Wat hebben wi ghesproken teghen di? Ghi hebt gheseit Idel is hi die god dient. Ende wat baet hebben wi want wi bewaert

[p. *584a]

hebben sijn gheboden: ende want wi gewandert hebben droeuich biden here der scaren?

15

Daer om segghen wi nv salich die houaerdighe. Want si sijn gestarct boesheit doende ende si hebben god becoert ende sijn ghesont geworden.

16

Doe hebben gesproken die god ontsien: een igelic mit sijnen naesten. Ende die here heeft aenghemerct ende heeft ghehoert ende tboec der vermaninghe is ghescreuen bi hem den ghenen die god ontsien ende dencken sijnen naem.

17

Ende die here der scaren seit: si sullen mij sijn in een wtuercoren volck in den daghe als ict sal doen: ende ic salse sparen als een man spaert sijnen soen die hem dient

18

Ende wort bekeert. ende ghi sult sien wat onderscheit is tusschen rechtuaerdich ende onrechtuaerdich: ende tusschen den ghenen die god dient ende die hem niet en dient.