Bible in duytsche (Delftse bijbel 1477)

§ Ca .ij

1

ENde o priesteren dit ghebot is nv tot v.

2

Die here der scaren seit Ist sake dat ghi niet en wilt horen ende niet en wilt setten op v hert dat ghij gheeft glorie mijnen naem: ic sal in v senden armoede ende sal vermaledien uwe benedyinghe: ende ic sal die vermaledien want ghi niet geset en hebt opt hert.

3

Siet ic sal van v werpen den arm ende sal stroeyen op v aensicht dreck uwer hoechtiden: ende sal v toenemen mit hem

4

Ende die here der scaren seit. ghi sult weten want ic tot v gesent heb dit ghebot. dat mijn voerwaerd soude sijn mit leui.

5

Mijn voerwaerd des leuens ende des vreden was mit hem: ende ic heb hem ghegheuen anxt. ende hi heeft mi ontsien: ende hi vreesde vanden aenschijn mijns namen.

6

Die wet des waerheits was in sijnen mont: ende boesheit en is niet gheuonden in sijnen lippen Hi heeft ghewandert mit mi in vreden ende in rechtuaerdicheit: ende heeft of ghekeert veel menschen vander boesheit

7

Want die lippen des priesters bewaren die wijsheit: ende si sullen die wet vraghen wt sijnen monde: want een enghel is des heren der scaren.

8

Mer gi sijt ghegaen vanden wech: ende hebt scandaliseert veel menschen inder wet. Die here der scaren seit: ghi hebt te niet gemaect die voerwaerd van leui.

9

Om dat heb ic v ghegheuen versmadelic ende oetmoedich allen volcken: als ghi niet ghehouden en hebt mijn weghen: ende ghi hebt aengenomen dat aensicht in die wet.

10

En isser niet een vader onser alre? En heeft niet een god ons ghescapen? Waer om dan versmaet een yghelijc van ons sijnen brueder: brekende die voerwaerd onser vaderen?

11

Iuda heeft ouerghetreden ende is gheworden een versmadenisse in israhel ende in iherusalem: want iudas besmit heeft die heilichmaking des heren die hi gemint heeft: ende si hebben ghehad een dochter eens vreemden gods.

12

Die here sal verderuen den man die dat ghemaect heeft: die meester ende discipel vanden tabernakel iacob: ende die offert een gaue den here der scaren

13

Ende dat hebdi anderwerf ghedaen. Ghi decte den outaer des heren mit tranen mit screyen ende huylen: also dat ic niet en sal aensien voertmeer tot v sacrificie: noch ic en sal niet ontfanghen wat behaechlics van uwer hant.

14

Ende ghi hebt gheseit. Om wat saec? Want die here getuycht heeft tusschen di ende dijn wijf dijnre ioncheit: die du versmaet hebtse Ende dit is dijn ghesellinne: ende wijf dijns vreden.

15

En heeft niet een ghe-

[p. *584]

maect: ende is ouerblijf sijns gheestes? Ende wat begheert die een. dan tsaet gods? Hier om bewaert uwen gheest ende en wilt niet versmaden dat wijf dijnre ioncheit.

16

Die here god van israhel seit Als ghi yemant haet vergheeftet hem. Die here der scaren seit: mer die boesheit sal bedecken sijn cleet. Bewaert uwen gheest: ende en wilt niet versmaden.

17

Ghi hebt den here doen arbeiden in uwen redenen. Ende ghij hebt gheseit. Waer in hebben wi hem doen arbeiden? In dien dat ghi segt. Alle die quaet duet is guet inden aenschijn des heren: ende sulken behaghen hem Of seker. waer is god des oerdeels?