Bible in duytsche (Delftse bijbel 1477)

§ Ca .I.

1

DIe last des heren woorts tot israhel in die hant malachie des propheten

2

Die here seyt ic heb v lief ghehadt. Ende ghi hebt geseit. In welken hebdi ons lief gehad? Die here seit en was esau niet iacobs brueder? Ende ic heb iacob lief ghehad:

3

mer esau ghehaet. Ende ic heb gheset sijn berghen in enicheit ende sijn erffenisse in draken des woestijns.

4

Ende ist sake dat ydumea sal segghen wi sijn verderft mer wederkerende sullen wi timmeren die dinghen die verdoruen sijn: die here der scaren seit dit. Dese sullen timmeren: ende ic salt verderuen. Ende si sullen worden geheten eynden der boesheit: ende een volc wien die here toernich is tot inder ewicheit.

5

Ende v oghen sullen sien: ende ghi sult segghen. Die here moet worden groet ghemaect op den eynde israhel.

6

Die soen eert den vader: ende die knecht sijnen here Hier om ist sake dat ic bin vader waer is mijn eer: ende ist sake dat ic bin here. waer is mijn anxt seit die here der scaren? Tot v o priesteren: die versmaet mijnen naem. Ende ghi hebt gheseit In welc hebben wi dijnen naem versmaet?

7

Ghi offert op mijn outaer besmit broet. Ende ghi segt. Waer in hebben wi di besmit? Daer in dat ghi segt: die tafel des heren is versmaet.

8

Of ghi offert een blint dier en ist niet quaet? Ende of ghi offert een manc of een siec dier: en ist niet quaet? Offert dat dijnen hertoech: oft hem behaecht. of ontfanct hi dijn aensicht seit die here der scaren.

9

Ende nv bidt dat aensicht gods dat hi uwer ontfermen wil: want van uwer hant is dit gheschiet: of hi in enigher manieren ontfanghen wil v aenschijn seit die here der scaren.

10

Wie is onder v die sluyt die doren ende ontsteect mijn outaer te vergheefs? Die here der scaren seyt mijn wil en is niet in v: ende ic en sal gheen gaue ontfanghen van uwe hant

11

Want vanden opganc der sonnen totten onderganc is mijn naem groet onder den volken: ende in allen steden wort gheheilicht ende gheoffert mijnen naem een reyn offerhande: want die here der scaren seit mijn naem is groet onder den volken.

12

Ende ghi hebt dat ontreint daer in dat ghi segt die tafel des heren is besmit: ende datter op gheset wort

[p. *583]

is versmadelic mitten vyer welc dat verslint.

13

Ende ghi hebt gheseit. Siet vandeu arbeit: die here der scaren seyt ende ghi hebt dat wt geblasen. Ende hebt mi ingebrocht vanden rouen hijnckende ende queelende: ende hebt in ghedraghen een gaue. Sal ic die ontfanghen van uwer hant seit die here?

14

Vermaledijt moet sijn die bedriegher die een manneken heeft in sijn kudde: ende doende sijn belofte offert den here een cranc dier. Die here der scaren seit want ic bin een groet coninc ende mijnen naem is veruaerlic onder den volcken