Bible in duytsche (Delftse bijbel 1477)

§ Ca .xiij

1

IN dien dage sal sijn een openbaer fonteyn den huys dauid ende die wonen in iherusalem: in ofwassinghe des sonders ende des erfsondes.

2

Ende die here der scaren seit het sal sijn in dien daghe. ic sal verderuen die namen der afgoden vander aerden: ende si en sullen niet meer worden gedocht. Ende ic sal ofhalen vander aerden die valsche propheten ende den onreynen geest.

3

Ende het sal sijn wanneer yemant voertmeer sal propheteren: sijn vader ende sijn moeder die hem ghewonnen hebben sullen hem segghen. Du en sultste niet leuen want du loghen ghesproken hebtste inden naem des heren. Ende sijn vader ende sijn moeder sijn ouders sullen crucen als hi gepropheteert heeft.

4

Ende het sal sijn: in dien daghe sullen die propheten bescaemt worden een yghelic wt sijn visioen als si gepropheteert hebben: noch si en sullen niet meer gedect worden mit enen mantel van enen sac gemaect op dat si liegen sullen.

5

Mer hij sal segghen: ic en bin gheen propheet Ic bin een ackerman: want adam is mijn exempel van mijnre ioecht

6

Ende hem sal worden geseit. Wat sijn dese wonden int middel dijnre handen? Ende hi sal segghen. Mit desen bin ic ghewont int huys der gheenre die mi lief hadden

7

Die here der scaren seit swaert wort verwect op mijnen harde ende op den man die hem mede anhanct. Slaet den harde ende die scapen sullen verstroeyt worden. Ende die here seit ic sal mijn hant keren tot die cleynen:

8

ende sullen wesen in al aertrijc Twe delen in hoer sullen worden verstroeyt ende ontbreken ende tderdedeel sal worden gelaten in hoer

9

Ende ic sal terdendeel leiden doer vier ende ic salse bernen als siluer ghebrant wort: ende ic salse proeuen als gout wort gheproeft. Dat volc sal aenroepen mijnen naem: ende ic salse verhoren. Ende ic sal segghen. du sijtste mijn volc. ende tvolc sal segghen. here mijn god