Bible in duytsche (Delftse bijbel 1477)

§ Capitel .xij.

1

DIe last des woerds des heren op israhel Die here die wttrect den hemel ende sticht die aerde: ende maect den geest des menschen in hem die heeft geseit

2

Siet ic sal setten iherusalem een opperdorpel der gulsicheit allen volken inden omganc. Mer oeck iuda sal sijn int belegghe teghen iherusalem.

3

Ende het sal sijn: inden dach sal ic setten iherusalem een steen der swaricheit allen volcken. Alle diese opheffen. sullen gescoert worden mit snidinghe: ende alle riken der aerden sullen vergadert worden teghen iherusalem.

4

Die here seit in dien dage sal ic slaen alle paert mit stiuicheit: ende sijnen opclimmer in raserie. Ende ic sal opdoen mijn oghen op thuys van iuda: ende ic sal slaen alle paert der volcken mit blintheit.

5

Ende die hertoghen van iuda sullen segghen in hoerre herten. die woenrers van iherusalem moeten mi worden gesterct inden huse der scaren hoerre goden.

6

In dien daghe sal ic setten die hertoghen van iuda als een scoersteen des viers inden houten. ende als een brant viers in hoye: ende si sullen verslinden totter rechter hant ende totter luchter hant alle volcken inden omganc. Ende iherusalem sal weder bewoent worden in sijn stede in iherusalem.

7

Ende die here sal behouden die tabernaculen iuda als int beginne: op dattet huys dauid niet en moet grotelijc verblijden: ende die glorie der woenrers van iherusalem teghen iudam.

8

In dien daghe sal die here beschermen die woenrers van iherusalem. Ende die wt hem sal vertoernen in dien daghe sal sijn als dauid: ende thuys dauids als thuys gods: als die enghel des heren in sijn aenschijn.

9

Ende het sal sijn. in dien daghe sal ic begheren te verderuen alle volcken de comen teghen iherusalem

10

ende ic sal wtstortten op thuys dauid ende op die woenrers van iherusalem den gheest der ghenaden ende der ghebeden. Ende si sullen sien

[p. *580]

tot mi diese vast ghemaect hebben: ende sullen hem bescreyen mit karmen als op een eengheboren soen: ende si sullen drouich sijn op hem alsmen pleech drouich te sijn inden doot des eerstgheboren soens

11

In dien daghe sal sijn groet screyen in iherusalem als die screyinghe tot remmon inden velde magedon

12

Ende die aerde sal screien: huysghesin ende huysgesin verscheiden Dat huysghesin des huys dauid verscheiden: ende hoer wijuen verscheiden. Die familie des huys nathan verscheiden. ende hoer wijuen verscheiden.

13

Die familie des huys leui verscheiden ende hoer wijuen verscheiden. Die familie semei versheiden. ende hoer wijuen versheiden.

14

Ende alle ander familie: familie ende familie verscheiden. ende hoer wiuen verscheiden