Bible in duytsche (Delftse bijbel 1477)

§ Ca .xi.

1

DOet op libane dijn poerten. ende tvier moet eten dijn cederbomen

2

Huylt du vueren boem want die cederboem is gheuallen: want die groetmakende sijn verderuet. Huylt ghi akerbomen van basan: want wt ghehouwen is dat starcke bosch.

3

Die stemme des screyens der herden: want hoer mogentheit is verdoruen. Die stemme des briesschens der leeuwen: want die houerdie des ioerdaens is verderft.

4

Dit seit die here mijn god. Voedt die beesten der dodinghe:

5

welc die besitters doden ende en waren niet droeuich: ende vercochten die ende seiden. Ghebenedijt si die here: wi sijn rijc gheworden. Ende hoer harden en hebben hem niet ghespaert

6

ende ic en sal niet meer sparen seit die here die woenrers op der aerden Siet ic sal ouer gheuen die menschen. een yghelijc in die hant sijns naesten. ende in die hant sijns conincs: ende si sullen te samen sniden die aerde ende ic en salse niet verlossen van hoer hant:

7

ende ic sal voeden een beest des dootslachts daer om gi armen des kuddes Ende ic heb mi toegenomen twee rueden: die een heb ic geheten schoenheit. ende die ander heb ic gheheten een bant. ende ic heb gheuoedt die kudde.

8

Ende ic heb wtghesneden drie herden in een maent: ende mijn ziel is tsamen ghetogen in hem Want hoer ziel heeft verwandelt in mi.

9

Ende ic heb geseit. Ic en sal v niet voeden. Dat sterft moet steruen. ende dat wtgesneden wort moet wtgesneden worden: ende die ander moeten verslinden een yghelijc vleysch sijns naesten

10

Ende ic heb ghenomen mijn ruede die gheheten was schoenheit. ende ic hebse verborgen: op dat ic te niet maken soude mijn vorwaerd die ic geslagen heb mit allen volcken:

11

ende si is tot niet ghebrocht in dien daghe. Ende die armen der scaren die mi bewaren hebben soe bekent: wanttet des heren woert is.

12

Ende ic heb geseit tot hem. Ist guet in uwen

[p. *579]

oghen: brenct mijn loen: ende en ist niet soe rust. Ende si hebben op gheweghen mijn loen: dertich silueren penninghen

13

Ende die here heeft gheseit tot mij. Werpt dat totten genen die den sac bewaert. Een scoen loen. daer ic om ghecocht bin van hem. Ende ic heb ghenomen die dertich silueren penninghen ende heb die geworpen in des heren huys tot dien die den sac bewaert.

14

Ende ic heb wtgesneden mijn ander ruede die ghenoemt was een bandekijn: op dat ic ontbinden soude die broederscap tusschen iudam ende israhel.

15

Ende die here heeft gheseit tot mi. Noch neemt du die vaten eens sotten herde.

16

Want siet ic sal verwecken enen herde die niet visiteren en sal die gelaten sijn. ende en sal niet soeken dat verstroeyt is. ende en sal niet ghesontmaken dat gequetst is ende dat staet en sal hi niet voeden: ende sal eten dat vleysch der vetter beesten: ende hoer claeuwen sal hi ontbinden.

17

O harde ende afgod die achterlaetste die kudde.. Een zwaert op sijn arm: ende op sijn rechter oghe. Sijn arm sal worden gedroecht van dorheit: ende sijn rechter oge verdonckerende sal worden verdonckert.