Bible in duytsche (Delftse bijbel 1477)

§ Ca .xiiij.

1

SIet die daghen comen seit die here. ende dijn rouen sullen worden ghedeelt in dijn middel.

2

Ende ic sal vergaderen alle volcken tot iherusalem in een strijt: ende die stat sal gewonnen worden. ende die huysen sullen worden verderft: ende die vrouwen sullen worden vercracht. Ende thalf deel der stat sal wtgaen in gheuangenisse: ende tander volc en sal niet worden ghenomen vter

[p. *581]

stede.

3

Ende die here sal wtgaen ende sal striden teghen die volcken: als hi ghestreden heeft inden dach des strijts.

4

Ende sijn voeten sullen staen in dien daghe opten berch van oliueten: die is teghen iherusalem totten oesten. Ende die berch van oliueten sal worden ghedeelt van sijn half deel totten oesten ende totten westen mit een seer grote scoer Ende die helft des berchs sal worden gesceiden totten noerden. ende die helft totten sudyen.

5

Ende gi sult vlien totten dal der berghen: want dat dal der berghen sal worden te samen geuoecht totten naesten. Ende gi sult vlien als ghi vloecht vanden aensicht des aertbeuings inden daghen osie des conincs van iuda. Ende die here mijn god sal comen: ende alle heilighen mit hem.

6

Ende tsal sijn: in dien dage en sal niet sijn licht mer coude ende vorst.

7

Ende een dach sal sijn die bekent is den here: niet dach noch nacht: ende inder tijt des auonts sal sijn licht.

8

Ende tsal sijn: in dien daghe sullen leuende wateren wtgaen van iherusalem. Die helft der wateren tot die oesterse zee: ende die helft tot die leste zee. Si sullen sijn inden somer ende inden winter:

9

ende die here sal sijn coninc op al aertrijc. In dien dage sal sijn een here ende sinen naem sal een sijn

10

Ende alle aerde sal weder keren tot die woestijn: vanden houel remmon totten suyden van iherusalem. Ende sal worden verhoecht ende sal worden bewoent in hoer steden van die poerte benyamin tot die stede der eerster poerten ende tot die poert der hoernen: ende vanden toerne ananehel tot die wijnparsen des conincs.

11

Ende si sullen daer in wonen. ende maledictie en sal niet meer sijn. Mer iherusalem sal sitten vri:

12

ende dit sal sijn die plaghe mit welc die here sal slaen alle volcken die ghestreden hebben teghen iherusalem. Tvleisch een yghelics staende op sijn voeten sal ontbreken: ende sijn oghen sullen ontbreken in horen gaten: ende sijn tonghe sal ontbreken in sijnen mont.

13

In dien daghe sal sijn groet gherucht des heren onder hem: ende een man sal aenuangen die hant sijns naesten: ende sijn hant sal tsamen striden op die hant sijns naesten.

14

Mer oec iudas sal striden teghen iherusalem. Ende die rijcdommen alre volcken sullen worden vergadert in den omganc: gout ende siluer ende cleder veel ghenoech.

15

Ende so sal sijn die val des paerts ende des muyls ende des cameels ende des ezels ende al der beesten die gheweest sijn in dien castelen: als dese val.

16

Ende alle die ouerbliuen sullen van allen volcken die ghecomen sijn teghen iherusalem: sullen opclimmen van iaer tot iaer. om aen te bidden den coninc here der scaren: ende te vieren die hoechtiden der tabernaculen.

17

Ende tsal sijn die niet op en climt vanden familien der aerden tot iherusalem om aen te beden den coninc here der scaren: op hem en sal gheen reghen sijn.

18

Ende ist sake dat die familie van egipten niet op en clom ende niet en quame: noch op hem en sal wesen regen. mer sal wesen verderffenisse daer die here sal mede slaen alle volcken: die niet op en climmen om

[p. *582]

te vieren die hoechtijt der tabernaculen.

19

Dat sal sijn die sonde van egipten ende dat sal sijn die sonde alre volken: die niet op en climmen om te vieren die hoechtijt der tabernaculen.

20

In dien daghe sal sijn dat op den toem des paerts is. sal heilich sijn den here: ende die ketelen inden huyse des heren sullen sijn als scalen biden outaer.

21

Ende alle ketel in iherusalem ende in iuda sal sijn gheheilicht den here der scaren. Ende si sullen alle comen offerende ende sullen nemen wt hem: ende coken daer in. Ende in dien dage en sal niet meer sijn coepman inden huse des heren der scaren.