Bible in duytsche (Delftse bijbel 1477)

§ Ca .ix.

1

DIe last twoerts des heren inden lande adrach ende damasci sijnre rust: want die here is des menschen oge ende alder geslachten van israhel.

2

Emath is oec in sijnen eynden: ende tyrus ende sydon. Want si hebben hem aenghenomen wijsheit alte seer.

3

Ende tyrus heeft ghetimmert sijn bescherminge ende heeft vergadert siluer als aerde ende gout als slijc der straten.

4

Ende siet die here salse besitten: ende sal slaen sijn starcheit inder zee: ende dese sal verslonden worden vanden vyer.

5

Ascalon sal sien ende sal vresen: ende gaza ende sal seer droeuich sijn: ende accaron want sijn hoep ghestoert is. Ende die coninc van gaza sal vergaen: ende ascalon en sal niet bewoent worden.

6

Ende die sceyder sal sitten in azoto: ende ic sal verderuen die houerdie der philisteen.

7

Ende ic sal ofhalen sijn bluet van sijnen mont: ende sijn versmadenisse van tmiddel sijn-

[p. *577]

re tanden. Ende hi sal worden oec ghelaten onsen god: ende sal sijn als een hertoech in iuda: ende accaron als ihebuseus.

8

Ende ic sal ombeuangen mijn huys wt desen die mi dienen stridende ende gaen ende weder keren: ende voertmeer en sal gheen scatter gaen ouer hem: want nv heb ic ghesien mit mijnen oghen.

9

Dochter van syon verblijt genoech: wese vrolick dochter iherusalem. Siet dijn coninc sal di comen rechtuaerdich ende ghesontmaker: hi is arm ende climmende op een eselinne: ende op hoer ionge

10

Ende ic sal verderuen den waghen wt ephraym. ende tpaert van iherusalem ende die boech des strijts sal verdoruen worden. Ende hi sal spreken vrede den heidenen: ende sijn macht vander zee tot die zee: ende vanden riuieren totten eynden der aerden.

11

Ende du hebtste wt ghesent dijn ghebonden inden bluede dijns testaments vander cule daer geen water in en is.

12

Wort bekeert tot die beschermenisse ghi die tsamen ghebonden sijt in hope. Ende huden sal ic boetscappen ende weder gheuen di dubbele gauen:

13

want ic heb mi iudam wtgherect als een booch: ende ic heb veruolt ephrayms aerde. Ende syon ic sal dijn sonen verwecken op dijn sonen griexlant: ende ic sal di setten als een swaert der sterken.

14

Ende god die here sal worden ghesien op hem: ende sijn pijl sal wt gaen als blixem. Ende god die here sal singhen mit een trompe. ende sal gaen in een onweder des sudens

15

Die here der scaren salse beschermen: ende si sullen verslinden ende onder werpen mitten stenen der slingheren. Ende drinckende sullen si droncken worden als van wijn: ende si sullen worden veruolt als scalen: ende als hoernen des outaers.

16

Ende die here hoer god salse ghesontmaken in dien daghe als een scaer sijns volcs want die helighe stenen sullen worden opgheboert op sijn aerde.

17

Want wat is sijn guet. ende wat dinc is hem scoenre. dan tarwe der wtuercoren ende wijn voertbrenghende maechden?