Bible in duytsche (Delftse bijbel 1477)

§ Ca .viij

1

ENde dat woert des heren der scaren is geworden segghende.

2

Dit seit die here der scaren. Ic heb ghemint syon mit groter lieften. ende mit groter onwaerdicheit heb icse lief ghehadt.

3

Dit seit die here der scaren: ic bin weder ghekeert tot syon ende ic sal wonen int middel van iherusalem. Ende iherusalem sal worden geheten een stat des waerheits: ende een berch des heren der scaren een gheheilicht berch.

4

Dit seit die here der scaren Noch sullen wonen oude mannen ende wijuen inden straten van iherusalem ende die stock des mans sal sijn in sijn hant om veelheit der daghen.

5

Ende die straten des stats sullen veruolt worden mit ionghen kinderen: ende maechden spelende in sijn straten

6

Dit seit die here der scaren. Ist sake dattet swaer sal worden gesien inden ogen der ouerbliuinghe des volcs in dien daghen: en salt dan niet swaer sijn in mijnen ogen seit die here der scaren?

7

Dit seit die here der scaren. Siet ic sal behouden mijn volc vanden lande des oesten ende van westerlant:

8

ende ic salse toeleeden ende si sullen wonen int middel van iherusalem: ende si sullen mijn sijn als een volc ende ic sal hem sijn als een god inder waerheit ende in rechtuaerdicheit.

9

Dit seit die here der scaren. Uwe handen moeten worden ghesterct die hoert in desen dagen dese reden doer den mont der propheten: inden daghe daer in fondeert is thuys des heren der scaren dat die tempel soude worden getimmert

10

Voer dien dach en was geen loen der menschen noch der beesten: noch geen vrede en was den ingangher noch den wtgangher van verdriet: ende ic heb alle menschen ghelaten een yghelic teghen sijnen naesten.

11

Mer nv seit die here der scaren sal ic doen den ouerbliuin-

[p. *576]

ge des volcs niet naden eersten daghen:

12

mer het sal sijn een saet des vreden. Die wijngaert sal gheuen sijn vrucht: ende die aerde sal gheuen hoer vrucht Ende die hemelen sullen gheuen horen douwe: ende ic sal die ouerbliuinge des volcs doen besitten al dese dinghen

13

Ende het sal sijn: als ghi huys iuda ende huys israhel hebt gheweest een malediinghen onder den heidenen: also sal ic v behouden ende ghi sult sijn benediinghe. Niet en wilt vresen. Uwe handen moeten ghesterct worden

14

want dit seit die here der scaren. Alsoe ic ghedocht heb dat ic v pinighen soude doe v vaderen mi verwecten tot toernicheit seit die here. ende ic en heb niet ontfermt:

15

also ic bekeert hebbe ic gedocht in desen daghen dat ic guet doen wil iherusalem ende den huys van iuda. En wilt niet ontsien.

16

Dit sijn die woerde die ghij doen sult. Spreect waerheit een yegeghelic mit sijnen naesten.. Ooerdelt waerheit. ende oerdeel des vreden in uwen poerten:

17

ende en wilt niet dencken quaet in uwen herten een yeghelic tegen sijnen vrient: ende en wilt niet lief hebben loghenachtich sweren. Want die here seit alle dese dingen sijn die ic gehaet heb.

18

Ende twoerd des heren der scaren is gheworden tot mi ende seide.

19

Dit seit die here der scaren. Die vasten der vierder maent ende die vasten der vijfter ende die vasten der seuender ende die vasten der thiender maent sal sijn den huyse iuda in blijscap ende in vrolicheit: ende in seer schoen hoechtiden. Mint alleen waerheit ende vrede.

20

Dit seit die here der scaren. Tot dat die volcken comen ende wonen in veel steden:

21

ende die woenrers sullen gaen die een totten anderen ende segghen. Gae wi ende laet ons bidden dat aensicht des heren: ende laet ons soeken den here der scaren. Ic sal oec gaen:

22

ende veel volcken sullen coemen ende stercke volcken om te soeken den here der scaren in iherusalem: ende om te bidden dat aensicht des heren.

23

Dit seit die here der scaren. In dien daghen in welken thien mannen van allen tonghen der heidenen sullen aennemen den gheer eens ioden ende segghen: wij sullen gaen mit v. Want wi hebben ghehoert want god mit v is.