Bible in duytsche (Delftse bijbel 1477)

§ Ca .vij.

1

ENde tis geschiet int. vyerde iaer des conincs darij: twoert des heren is gheworden tot zachariam inden vierden dach der neghender maent die gheheten is casleu.

2

Ende si hebben ghesent totten huys gods sarasar ende rogomelech ende mannen die waren mit hem om te bidden dat aensicht des heren:

3

dat si segghen souden den priesteren des huys des heren der scaren ende den propheten sprekende. Sal ic screyen in die vijfste maent: of sal ic mi heilich maken als ic ghedaen hebbe nv veel iaren.

4

Ende twoert des heren der scaren is geworden tot mi segghende.

5

Spreect tot al tvolc der aerden: ende tot die priesteren ende segt. Doe ghi vastede ende screide in die vijfste maent ende in die seuende doer dese tseuentich iaren: en hebdi den vasten mi niet geuast.

6

Ende als ghi ghegheten hebt ende ghedroncken: en hebdi v seluen niet ghegheten ende v selven ghedroncken?

7

En sijn dit niet die woerden die die here gesproken heeft in die hant der eerster propheten doe iherusalem noch bewoent wort ende was rijc: si ende die steden in horen omganc: ende

[p. *575]

wort bewoent totten suden ende inden slechten velden?

8

Ende twoert des heren is gheworden tot zachariam ende seide.

9

Dit seit die here der scaren segghende. Oerdeelt warachtich oerdeel ende doet barmherticheit ende ontfermenisse een yghelic mit sijnen broeder.

10

Ende en wilt niet veronrechten weduwe ende wese ende den vreemden ende den armen: ende gheen man en moet dencken quaet sijnen brueder in sijnre herten

11

Ende si en hebben niet willen mercken ende hebben of ghekeert hoer scouder ende sijn wech ghegaen: ende hebben beswaert hoer oren datse niet en souden horen:

12

ende hebben gheset hoer hert als een adamant datse niet en souden horen die wet ende die woerden die ghesent heeft die here der scaren in sijnen heiligen geest doer die hant der eerster propheten. Ende grote onwaerdicheit is gheworden vanden here der scaren.

13

Ende tis gheschiet: alsoe ic ghesproken heb ende si en hebben niet ghehoert: ende die here der scaren seit also sullen si roepen ende ic en salse niet verhoren.

14

Ende ic hebse verstroeyt doer alle riken diese niet en kennen: ende tlant is woest gheworden van hem daer om want daer niemant doer en ghinc noch wederkeerde: ende si hebben gheset dat begheerlike lant in een woestijn.