Bible in duytsche (Delftse bijbel 1477)

§ Ca .vi.

1

ENde ic bin ghekeert: ende heb op gheboert mijn oghen ende heb ghesien: ende siet vier waghenen wtgaende van tmiddel van tween berghen ende die berghen waren metalen bergen.

2

Inden eersten wagen waren rode paerden: inden anderden waghen swarte paerden:

3

inden derden waghen witte paerden: ende inden vierden wagen bonte paer-

[p. *574]

den ende starck.

4

Ende ic heb gheantwoerd: ende gheseit totten enghel die in mi sprac. Mijn here wat sijn dese?

5

Ende die enghel heeft gheantwoerd ende gheseit tot mi. Dit sijn vier winden des hemels: die wtgaen om te staen biden here al aertrijcs.

6

Daer die swarte paerden in waren ghingen wt int noert lant: ende die witten sijn wt ghegaen na hem: ende die bonten sijn wt gegaen tot zuyden lant.

7

Mer die alre starcste waren sijn wtghegaen: ende si begheerden te gaen ende te lopen doer al aertrijck Ende hi heeft gheseit. Gaet. ende doerwandert die aerde. Ende si hebben gewandert doer die aerde.

8

Ende heeft mi geroepen: ende heeft ghesproken tot mi ende seide. Siet die wtgaen int noerden lant: hebben mijnen gheest doen rusten in tlant des noerdens.

9

Ende twoert des heren is gheworden tot mi ende seide.

10

Neemt vander ouerwanderinghe van oldai ende van thobia ende van ydaia. ende du sultste comen inden daghe ende gaen int huys iosie eens soons sophonie die gecomen sijn van babilonien:

11

ende du sultste nemen gout ende siluer ende maken cronen ende sultstse setten op thoeft ihesu iosedechs soen des groten priesters:

12

ende sult spreken tot hem segghende. Die here der scaren sprect dit segghende. Siet een man. opgaende is sijn naem Ende onder hem sal opgaen: ende hi sal timmeren den here enen tempel:

13

ende hi sal dien voltimmeren den here Ende hi sal draghen glorie: ende sal sitten ende sal heerscappie hebben op sinen stoel. Ende die priester sal sijn op sijnen stoel ende raet des vreden sal sijn tusschen die twe.

14

Ende die cronen sullen sijn helem ende thobie ende ydaie ende hen den soen sophonie: een ghehoechnisse inden tempel des heren

15

Ende die verre sijn sullen comen ende sullen timmeren inden tempel des heren: ende ghi sult weten want die here der scaren heeft mi ghesent tot v Mer dit sal sijn: ist sake dat ghi sult horen die stemme des heren uwes gods