Bible in duytsche (Delftse bijbel 1477)

§ Ca .v

1

ENde ic bin ghekeert: ende heb op gheboert mijn oghen ende heb gesien: ende siet een boec vlieghende.

2

Ende hi heeft gheseit tot mij. Wat sietstu? Ende ic heb gheseit. Siet ic sie een boec vlieghende: sijn lancheit is twintich cubiten: ende sijn breetheit thien cubiten.

3

Ende hi heeft geseit tot mi. Dit is die maledictie die wtgaen sal opt aensicht al aertrijcs. want alle dief als daer ghescreuen is sal gheoerdelt worden: ende alle die sweert. wt dat sal gelijc gerecht worden.

4

Die here der scaren seit ic sal dat wtleiden: ende tsal comen totten huyse des dieues ende tot den huyse des geens die sweert in mijnen naem valschelijc. ende sal wonen int middel sijns huys: ende sal hem verteren ende sijn houten ende sijn steen.

5

Ende die enghel die in mi sprac is wt gegaen ende heeft gheseit tot mi. Hef op dijn oghen ende sie. Wat is datter wtgaet?

6

Ende ic heb gheseit. Wat ist? Ende hij heeft geseit. Dit is een kanne wtgaende. Ende hi heeft gheseit. Dit is hoer oge in al aertrijc.

7

Ende siet een pont loots wort gedraghen: ende siet een wijf sittende int middel der kannen.

8

Ende hi heeft gheseit. Dit is die boesheit Ende hi heeftse geworpen int middel der kannen: ende heeft gheworpen een stuck loots in horen mondt.

9

Ende ic heb oec op geboert mijn oghen ende hebbe gesien: ende siet twe wijuen wtgaende. ende die wint in horen wieken. Ende hadden vloghelen als wuwen vloghelen. ende boerden op die kanne tusschen die aerde ende den hemel.

10

Ende ic heb gheseit totten enghel die in mi sprac. Waer dragen dese die kanne?

11

Ende hi heeft geseit tot mi. Op dat hoer een huys getimmert sal worden int lant sennaar ende worden gheuest ende worden daer gheset op sijn fondament.