Bible in duytsche (Delftse bijbel 1477)

§ Capitel .iiij.

1

ENde die engel is weder gekeert die in mi sprac: ende heeft mi gewect als een man die ghewect wort van sinen slaep

2

Ende heeft gheseit tot mi. Wat sietstu? Ende ic heb geseit. Ic heb gesien: ende sich enen gouden candelaer ende sijn lamp op sijn hoeft: ende sijn seuen lantaernen daer op: ende seuen vaten daer men den olye mede ingoet die waren op sijn hoeft:

3

ende twee olijuen bomen op dat: een ter rechter hant der lampen ende een ter luchter hant.

4

Ende ic heb geantwoert: ende seide tot den engel die in mi sprac seggende Mijn here wat sijn dese?

5

Ende die enghel die in mij sprac heeft gheantwoert: ende heeft gheseit tot mi. En weetstu niet wat dese sijn? Ende ic heb gheseit. Neen mijn here.

6

Ende hi heeft gheantwoert ende seide tot mi segghende Dat is des heren woert tot zorobabel seggende. Die here der scaren seit. niet in scare des volcs noch in starcheit: mer in mijnen geest

7

Wie bistu grote berch bi zorobabel sultstu worden slecht? Ende hi sal toeleiden den eersten steen: ende sal gheliken die gracie sijnre gracien.

8

Ende

[p. *573]

twoert des heren is geworden tot mi segghende.

9

Die handen zorobabel hebben fondeert dit huys: ende sijn handen sullent volbrenghen: ende ghi sult weten want die here der scaren heeft mi gesent tot v.

10

Want wie heeft versmaet die cleyne daghen? Ende si sullen verbliden: ende si sullen sien enen tinnen steen in zorobabels hant. Dit sijn seuen oghen des heren: die lopen in al aertrijc.

11

Ende ic heb gheantwoert: ende gheseit tot hem. Wat sijn dese twe oliuen totter rechter hant des candelaers ende tot sijn luchterhant?

12

Ende ic heb gheantwoerd anderwerf: ende heb geseit tot hem Wat sijn die twe aren der oliuen die sijn bi die twe gouden nebben: in welken hangen die ingieters van goude?

13

Ende hi heeft gheseit tot mi ende sprac En weti niet wat dese sijn? Ende ic heb gheseit. Mijn heer neen.

14

Ende hi heeft gheseit. Dit sijn twee sonen des olijs: die bistaen den here al aertrijcs