Bible in duytsche (Delftse bijbel 1477)

§ Ca .iij.

1

ENde die here heeft mi getoent ihesum den groten priester staende biden enghel des heren: ende sathan stont aen die rechter side om dat hi hem contrarie soude sijn.

2

Ende die here heeft gheseit tot sathan. Die here moet berispen in di sathan: ende die here moet berispen in di die wtuercoren heeft iherusalem. En is dit niet een brant wtghetoghen vanden vyer?

3

Ende ihesus was ghecleet mit snoden clederen: ende stont voer taensicht des enghels.

4

Ende hi heeft geantwoerd: ende gheseit tot die ghenen die bij hem stonden.. Neemt die snode clederen van hem. Ende hi heeft tot hem gheseit Siet ic heb ofghenomen van di dijn boesheit: ende heb di aenghetoghen verwandelde clederen.

5

Ende hi heeft geseit. Set een reyn miter op sijn hoeft Ende si hebben een reyn miter geset op sijn hoeft: ende hebben hem aengetoghen clederen.

6

Ende die enghel des heren stont ende tuychde ihesum ende seide

7

Dit seit die here der scaren. Ist dattu sultste wanderen in mijnen weghen ende bewaren mijn bewaringhe. du sultste oerdelen mijn huys ende bewaren mijn salen: ende ic sal di gheuen die wanderen van desen die nv hier bi staen

8

Hoert ihesus grote priester: du ende dijn vrienden die wonen bi di. want het sijn mannen die verre sien. Want siet ic sal toeleiden mijnen knecht opgaende:

9

want siet die steen die ic gegeuen heb bi ihesu. Op enen steen sijn seuen oghen. Ende die here der scaren seit ic sal wtsniden sijn beelt: ende sal ofhalen die boesheit sijns lants in enen daghe.

10

Die here der scaren seit in dien daghe. sal een man roepen sijnen vrient onder den wijngaert ende onder den vijchboem.