Bible in duytsche (Delftse bijbel 1477)

§ Ca .ij

1

ENde ic heb mijn oghen opgheboert ende heb ghesien: ende siet een man ende in sijn hant was een meters lijn

2

Ende ic heb gheseit Waer gaetstu? Ende hi heeft geseit tot mij. Ic gae om te meten dat ioedsche lant ende iherusalem hoe groet dat sijn breetheit is: ende sijn lancheit.

3

Ende siet die enghel die in mi sprac ghinc wt: ende die ander engel ghinc wt hem te gemoet

4

ende seide tot hem. Loep: ende spreect tot desen kinde ende segt. Iherusalem sal worden bewoent sonder mure van veelheit der menschen ende der beesten in hoer middel.

5

Ende die heer seit ic sal hem sijn een muer ende vier in horen omganc: ende int middel van hem sal ic sijn in glorien.

6

O o die heer seit vlyet vanden lande des noordens: want die here seit in vyer winden des hemels heb ic v verstroeyt.

7

O syon vlye die woenste bi die dochter van babilonien

8

want die here der scaren seit dit. Hij heeft mi ghesent na die glorie totten heidenen: die v beroeft hebben. Want die v roert. roert den appel mijns oges

9

Want siet ic hef op mijn hant op hem: ende si sullen sijn rouen den ghenen die hem ghedient hebben: ende ghi sult bekennen dat god der scaren mi gesent heeft.

10

O dochter van syon loeft ende verblijt: want siet ic coem ende ic sal wonen seit die here int middel dijns.

11

Ende veel heydenen sullen worden toegheuoecht totten here in dien daghe: ende sullen mi sijn in een volc. Ende ic sal wonen int middel dijns ende du sultste weten want die here der scaren heeft

[p. *572]

mi ghesent tot di.

12

Ende die here sal besitten iudam ende sijn deel in gheheilicht lant: ende sal wtuerkiesen iherusalem.

13

Alle mensch moet swighen vanden aenscht des heren: want hi is opghestaen van sijn heilighe woninghe