Bible in duytsche (Delftse bijbel 1477)

§ Ca .I.

1

IN die achte maent int anderde iaer des conincs darij: is des heren woert gesproken tot zachariam den propheet die soen was barachie die soon was addo

2

Die here is toernich geworden op uwe vaderen mit toernicheit.

3

Ende du sultste segghen tot hem. Die here der scaren die seit Wort bekeert tot mi sprect die here der scaren. Ende ic sal worden bekeert tot v seit die here der scaren.

4

Wilt niet sijn als uwe vaderen tot welken riepen die eerste propheten ende seiden die here der scaren seit dit. wort bekeert van uwen quaden weghen ende van uwen seer quadeu ghedachten: ende die here seit si en hebben niet gehoert noch aenghemerct tot mi.

5

Waer sijn v vaderen ende propheten? En sullen si niet int ewich leuen?

6

Nochtant mijn woerden ende mijn gheboden des wets die ic gheboden heb minen knechten den propheten: en hebben si niet ombegrepen v vaderen? Ende sijn sij bekeert ende hebben gheseit. Als die here der scaren heeft ghedocht ons te doen na onsen wegen ende na onsen versieringen: heeft hi ons ghedaen.

7

Inden vier ende twintichsten dach der elfster maent sabath int anderde iaer darij: is des heren woert gheworden tot zachariam den propheet: die soen was barachie die soon was addo ende heeft gheseit.

8

Ic heb ghesien inder nacht. ende siet een man climmende op een roet paert. ende hi stont tusschen die steden daer wassen die alre scoenste bomen die waren int diep: ende nae hem roede paerden bont ende wit. Ende ic heb gheseit.

9

Mijn here wie sijn dese Ende die enghel des heren die in mij sprac heeft gheseit tot mi. Ic sal di tonen wat dese sijn.

10

Ende die man die stont onder den bomen heeft geantwoerd ende geseit. Dese sijn die die here gesent heeft dat sij tlant doerwanderen sullen.

11

Ende si hebben gheantwoerd den engel die stont onder die bomen: ende hebben geseit. Wi hebben gewandert doer tlant ende siet al tlant is bewoent ende rust:

12

Ende des heren enghel heeft gheantwoerd ende gheseit. Hoer der scaren hoe langhe sultstu niet ontfermen iherusalem ende den steden iuda dien du toer-

[p. *571]

nich biste? Dit is nv tseuentichste iaer

13

Ende die here heeft gheantwoerd den enghel die in mi sprac goede woerden ende troestelike woerden.

14

Ende die enghel die in mi sprac heeft tot mi geseit Roept ende segt. Dit seit die here der scaren. Ic heb ghemint iherusalem ende syon mit groter minnen.

15

Ende ic bin toernich op die rike volken mit groten toerne: want ic wenich toernich bin: mer si hebben gheholpen in tquaet.

16

Daer om seit die here dit. Ic sal wederkeren tot iherusalem in barmherticheden: ende in haer sal mijn huys ghetimmert worden seit die here der scaren ende des metselaers loet sal wtgerect worden op iherusalem.

17

Noch roept ende segt Dit seit die here der scaren. Mijn steden sullen noch vloeyen mit goeden: ende die here sal noch troesten syon: ende sal noch wtuerkiesen iherusalem.

18

Ende ic heb op gheboert mijn oghen ende heb ghesien: ende siet vier hoernen.

19

Ende ic heb gheseit totten enghel die in mij sprac. Wat sijn dese? Ende hi heeft geseit tot mi. Dit sijn die hoernen: die ghequelt hebben iudam ende israhel ende iherusalem.

20

Ende die here heeft mi getoent vier smeeden.

21

Ende ic heb geseit. Wat comen dese te doen? Ende hi sprac ende seide. Dit sijn die hoernen die gequelt hebben iudam doer alle mannen ende nyemant van hem en heeft opgeboert sijn hoeft. Ende dese sijn ghecomen om die te verderuen: op dat si neder werpen sullen alle die hoernen der heidenen die hoernen op gheboert hebben op tlant van iuda: om dat te verstroeien.