Bible in duytsche (Delftse bijbel 1477)

§ Capittel ij.

1

COemt te samen ende wort ver-

[p. *566]

gadert ghi onminlic volc:

2

eer dit visioen vergaet als stof dat voerbi gaet den dach: eer dat die toren des heren gramscaps op v coemt. Alle sachtmoedighe der aerden soect den here: want ghi gewrocht hebt sijn oerdeel.

3

Soect den rechtuaerdighen soect den sachtmoedigen: of ghi moecht worden ghehuydt inden dach des heren torens.

4

Want gaza sal sijn verderft: ende ascolon in een woestijn. Si sullen wtwerpen azotum int suden: ende accaron sal worden wt geroedt.

5

Wee v verloren volc: die woent aen die soem des zees. O chanaan lant der philisteen des heren woert is op v: ende ic sal di verderuen also dat gheen woenre en sal sijn in di.

6

Ende die soem des zees sal sijn rust der herderen: ende hutten der beesten.

7

Ende die soem des zees sal sijn den ghenen die blijuen sal vanden huys iuda. Daer sullen si gheuoedt worden inden huysen ascolons: ende totten auont sullen si rusten. Want die here hoer god salse visiteren: ende sal ofkeren hoer vanghenisse.

8

Ic heb ghehoert die lachter moab: ende blasphemi der sonen amon die si verweten hebben minen volc: ende sijn groet ghemaect op hoer eynden.

9

Daer om seit die here der scaren god van israhel leef ic. Want moab sal sijn als sodoma. ende die soenen amon als gomorra: droecheit der doernen southopen: ende woestijn tot int ewich. Die ouerbliuinghe mijns volcs sullense berouen. ende die noch sijn van mijnen volc sullense besitten.

10

Want dat sal hem gheuallen om hoer houerdie: daer si mede gheblasphemeert hebben ende sijn groet gheworden op tvolc des heren der scaren.

11

Die here is veruaerlic op hem: ende sal vernielen alle goden der aerden. Ende mannen van sijnre stede sullen hem aenbidden: alle eylande der volcken.

12

Mer oec ghi moriaens: sult sijn doot gheslagen mit minen swaerde.

13

Ende hi sal sijn hant wtsteken opt noerden: ende sal verderuen assur. Ende sullen setten die schoen stat in ewicheit: ende sonder doerganc ende als een woestijn.

14

Ende int middel van hoer sullen rusten die beesten alle beesten der volcken: ende die roesdommer ende die eghel sullen wonen in horen dorpelen. Die stemme des singhers int ventster: ende die rauen inden ouersten dorpel: want ic sal vernielen hoer starcheit.

15

Dit is die gloriose stat die woent in betrouwen: die seide in hoerre harten. Ic bin: ende buyten mij en is voertmeer gheen ander. Hoe bistu geworden in een woestijn: ende een hol der beesten? Al die doer hoer gaet salse bespotten: ende roeren sijn hant.