Bible in duytsche (Delftse bijbel 1477)

§ Ca .I.

1

DEs heren woert dat gheschiet is tot sophoniam den soen chusi die soen was godolie die soen was amasie die soen was ezechie: inden daghen iosie ammons

[p. *565]

soen die coninc was van iuda.

2

Die here seit vergaderende sal ic uergaderen alle dinc vant aensicht der aerden: ende ic sal vergaderen mensch ende beest:

3

ende ic sal vergaderen die voghelen des luchts ende visschen des zees. Ende verderffenisse der bosen sullen sijn: ende die here seit ic sal verderuen die menschen vant aensicht der aerden.

4

Ende ic sal wtreiken mijn hant op iudam ende op alle die wonen in iherusalem: ende ic sal verderuen van deser stede die ouerbliuinghe baal. ende die namen der bewaerres mitten priesteren:

5

ende die gheen die aenbeden op die daken die ridderscap des hemels: ende aenbeden ende sweren inden here ende sweren in melchon:

6

ende die worden of gekeert van achter des heren rugghe: ende die niet ghesocht en hebben den here: noch hem niet ondersocht en hebben.

7

Swijcht vanden aenschijn gods des heren: want die dach des heren is na bi. Want die here heeft bereit offerhande: ende heeft gheheilicht sijn geroepen.

8

Ende tsal sijn: in den dach der offerhande des heren sal ic visiteren op die princen. ende op der coninghen sonen: ende op alle die ghecleet sijn mit een vreemt cleet.

9

Ende ic sal visiteren op alle die houaerdelic ingaet op den dorpel in dien dage: die veruollen thuys des heren hoers gods mit boesheit ende mit bedriechnisse.

10

Ende die here seit in dien dach sal sijn een stemme des roepens. van die poerte der visschen ende hulinghe van die anderde poorte: ende grote droffenisse vanden berghen.

11

Ghi woenres van iherusalem screyt. Al tvolc van chanaan heeft tsamen gheswegen: ende alle die in gewonden sijn mit siluer sijn vergaen.

12

Ende tsal sijn: in die tijt sal ic ondersoeken iherusalem mit lichten. ende sal visiteren op die mannen die gheuest sijn in horen onreynicheden: die segghen in hoerre herten. Die here en sal niet wel doen: ende hi en sal niet quaet doen.

13

Ende hoer starcheit sal sijn in een beroeuinghe: ende hoer huys in een woestijn. Ende si sullen timmeren husen ende niet bewonen: ende sij sullen planten wijngaerden ende niet drincken van horen wijn

14

Die grote dach des heren is hier bi: hi is na bi ende seer snel. Die stemme des daghes sheren is bitter: die stercke sal daer in ghepijnt worden.

15

Die dach is een dach des torens. een dach der tribulacien ende bangicheit. een dach des armoeds ende verdriets. een dach der duysternissen ende donckerheits. een dach des neuels ende onweders:

16

een dach des basuyns ende gheluyts op die starcke steden ende op die hoghe hoken der muren.

17

Ende ic sal tribuleren die menschen: ende si sullen wanderen als blinden: want si den here gesondicht hebben. Ende hoer bluet sal worden wtgestort als aerde: ende hoer lichaem als drec.

18

Mer hoer siluer ende gout en salse niet moghen verlossen: inden dach des torens des heren. Alle aerde sal worden verslonden inden viere sijns torens die mit haesticheit sal maken een verderffenisse allen creaturen die wonen op die aerde