Bible in duytsche (Delftse bijbel 1477)

§ Ca .iij.

1

WEe verwecster ende verloste stad: ende duue.

2

Si en heeft niet ghehoert die stemme: ende en heeft niet ontfanghen disciplijn. Si en heeft niet betrouwet inden here: si en heeft niet genaect tot horen god.

3

Hoer princen int middel van hoer: als briesschende leeuwen. Hoer rechteren als woluen en lieten niet van tsauonts totten morghen.

4

Hoer propheten rasende: mannen ende ongheloeuich. Hoer pristeren hebben omtrent den tempel: si hebben onrechtuaerdelic ghedaen tegen die wet

[p. *567]

5

Die rechtuaerdighe here int middel van hem: en sal niet doen boesheit. Des morghens vroech sal hij gheuen sijn oerdeel int licht: ende en sal niet worden verholen. Mer die bose en heeft niet geweten die bescamenisse

6

Ic heb verderft die volcken: ende hoer hoecken sijn verstroeyt. Ic heb hoer weghen woest gemaect: want niemant en is die daer doer gaet. Hoer steden sijn verderft: ende geen man en is ghebleuen noch inwoenre.

7

Ic heb gheseit. Nochtan sultstu mij ontsien: ende du sultste nemen disciplijn. Ende hoer woning en sal niet vergaen: om alle die dinghen daer icse in gevisiteert heb Nochtan sijn si vroech op ghestaen ende hebben quaet gemaect al hoer ghedachten.

8

Daer om seit die here verwacht mi inden dach mijnre verrisenisse int toecomende: want mijn oerdeel dat ic vergaderen sal die volcken ende ic sal vergaderen die riken. Ende ic sal op hem stortten mijn onwaerde alle den toren mijnre gramscap. Want alle aerde sal worden verslonden int tvier mijns torens

9

Want dan sal ic geuen den volcken een wtuercoren lippe op dat si alle sullen aenroepen sheren naem: ende dienen hem mit eenre scouder.

10

Van ouer die riuieren van ethiopien. sullen mijn oetmoedighe sonen mijnre verstroeyder mij brenghen gauen

11

Du en sultste niet worden bescaemt in dien daghe van allen dinen versieringhen: mit welcken du ouer ghetreden hebtste teghen mij. Want dan sal ic af halen van dijn middel die groet sprekers dijnre houerdien: ende du en sultste niet meer dencken verheuen te worden in mijnen heilighen berch.

12

Ende ic sal laten in dijn middel een arm volc ende behoeftich: ende sullen hopen inden naeme des heren.

13

Die ouerbliuinghe van israhel en sullen niet doen boesheit noch en sullen spreken loghentael: ende een bedrieghende tonghe en sal niet worden gheuonden in horen mondt. Want si sullen gheuoet worden ende sullen rusten: ende nyemant en sal sijn diese veruaren sal.

14

Dochter van syon loeft: israhel verblijt dij. Dochter van iherusalem wes vrolic ende verblide in al dijnre herten.

15

Die here heeft ofghehaelt dijn oerdeel: ende heeft of ghekeert dijn vianden. Die coninc van israhel ende here is in dijn middel: du en sulste niet meer quaet vresen.

16

In dien daghe sal worden geseit tot iherusalem. Syon en wilt niet ontsien: dijn handen moeten niet ontbreken.

17

Die here dijn god sterc int middel dijns: die sal dij ghesont maken. Hi sal verbliden op di in vrolicheit: hi sal swighen in dijnre lieften: ende sal verbliden op di in loue.

18

Ic sal vergaderen die loghenaers die ofghegaen waren vander wet. want se wt di waren: op dat ghi voertmeer niet en hebt lachter op hem.

19

Siet ic sal dootslaen alle die di ghepijnt hebben in die tijt: ende sal ghesontmaken den cropel: ende ic sal vergaderen die wtgeworpen was. Ende ic salse setten in loue. ende horen naem in allen lande hoerre bescamenisse: in die tijt

20

als ic v toeleiden sal: ende inder tijt: in welc ic v vergaderen sal. Ende die here seit Want

[p. *568]

ic sal v gheuen in een faem ende in lof allen volcken der aerden: als ic sal bekeren v geuanghenisse voer uwen ogen