Bible in duytsche (Delftse bijbel 1477)

§ Ca .ij.

1

IC sal staen op mijn bewaringhe: ende sal vastmaken mijnen graet op die beschermenisse. Ende ic sal bescouwen op dat ic sien mach wat mi gheseit wort: ende wat ic antworden sal tot dien die mi berispet

2

Ende die here heeft mi gheantwoerd ende geseit Scrijft dit visioen ende verclaert dat op tafelen: op dat diet lesen sal ouerlopen mach.

3

Want tvisioen is noch verre: ende sal openbaren int eynde ende en sal niet liegen. Ist sake dattet toeft verwachtet: want comende salt comen ende niet marren

4

Siet die onghelouich is: sijn siel en sal niet rechtuaerdich sijn in hem seluen. Mer die

[p. *563]

rechtuaerdighe sal leuen in sijnre gelouen.

5

Ende alsoe die wijn bedriecht den drincker: alsoe sal sijn een houaerdich mensch ende en sal niet gheeert worden Die heeft breet ghemaect als die helle sijn siel: ende hi als die doot: ende en sal niet veruolt worden. Ende hi heeft vergadert tot hem alle heydenen: ende heeft bi hem versament alle volcken.

6

En sullen al dese op hem niet nemen een bispeel ende een spraec sijnre raetselen? Ende men sal segghen: Wee hem: die vergadert dat hem niet en is. Ende hoe langhe beswaert hi teghen hem dick slijc?

7

En sullen si niet haestelijc tsamen opstaen die di biten sullen? Ende die di scoren. sullen verwect worden: ende du sultste hem sijn in een roef.

8

Want du beroeft hebtste veel volcken. so sullen di berouen alle die ouerbleuen sijn vanden volken: om tbloet des menschen ende om die boesheit der aerden des stats ende alle die daer in wonen.

9

Wee hem die vergadert quade ghiericheit sijnen huse: op dat sijn nest sij int hoghe: ende vermoedt dat hi verlost sal worden van die hant des quaets.

10

Du hebtste ghedacht bescamenisse dijnen huse: du hebste verderft veel volcken: ende dijn ziel heeft ghesondicht.

11

Want die steen van der muren sal roepen: ende thout dat is in die tsamenuoeghinghe der timmeringhe sal antwoerden.

12

Wee hem die timmert een stat inden blueden: ende bereit een stat in boesheit

13

En sijn dese dingen niet vanden here der scaren? Want die volken sullen arbeiden in veel vyers ende die volken sullen arbeiden te vergeefs ende sullen ontbreken.

14

Want die aerde sal veruolt worden dat si bekennen moghen die glorie des heren: als wateren die die zee bedecken.

15

Wee hem die drincken gheeft sijnen vrient. ende sent sijn galle: ende maect hem droncken om dat hi sien mach sijn naectheit. Hi is vervolt mit bescamenisse voer glorie. Drinc du oec: ende wort ontslaep.

16

Die pijn der rechterhant des heren sal dij ombeuanghen: ende die spuwinghe der bescamenisse op dijn glorie.

17

Want die boesheit van libano sal dij bedecken: ende die verderffenisse der beesten salse veruaren: vanden blueden der menschen ende boesheit der aerden ende des stats: ende alle die daer in wonen.

18

Wat baet een gesneden beeldt: want sijn maker heeftet ghesneden ende een ghegoteu ende valsch beeldt: want sijn maker heeft ghehoept in sijn maecsel op dat hi maken soude veel beelden?

19

Wee hem: die seit totten hout wort ontwaect: ende den zwigenden steen stont op Sal hi moghen leren? Siet dese is ghedect mit gout ende mit siluer: ende gheen geest en is in sijnen ingewanden.

20

Mer die here is in sijnen heilighen tempel: alle aerde moet swighen van sijn aenschijn