Bible in duytsche (Delftse bijbel 1477)

§ Ca .iij.

1

§ Dat ghebet van abbacuc des propheten voer sijn onwetenisse

2

HEre ic heb ghehoert dijn horinghe: ende heb gevreest. Here dijn werc: int middel der iaren maec dat leuendich. Du sultste bekent maken int middel der iaren: wanneer du toernich hebtste gheweest sultstu ghedencken der barmherticheit.

3

God sal comen van

[p. *564]

den suden: ende die heilich vanden berch pharan. Sijn glorie heeft bedect die hemelen altijt: ende die aerde is vol sijns loefs.

4

Sijn schijn sal wesen als licht: hoernen in sijnen handen. Daer is verholen sijn starcheit:

5

die doot sal gaen voer sijn aensicht. Die duuel sal wtgaen voer sijn voeten:

6

hi heeft ghestaen ende die aerde heeft hi ghemeten. Hij heeft aenghesien ende ontbonden die volcken: ende die berghen des werlts sijn tsamen te wreuen. Die houelen des werels sijn ghecromt: vanden weghen sijnre ewicheit Om die boesheit heb ic ghesien die tenten van ethiopien

7

die vellen des lands madian sullen worden verstoert.

8

Bistu here vertorent in den wateren: of is dijn gramscap inden riuieren: of is inder zee dijn onwaerde? Die opclimmes op dijn paerden: ende dijn waghenen sijn behoudinghe.

9

Verweckende sultstu verwecken dijnen boech: die eden die du ghesworen hebste den gheslachten. Du sultste altijt sniden die riuieren der aerden:

10

die bergen hebben di ghesien ende sijn droeuich gheweest: die stroem der wateren is ouer ghegaen. Die afgront heeft ghegheuen sijn stemme: die hoecheit heeft op gheboert sijn handen.

11

Die sonne ende mane hebben gestaen in hoer woninge: si sullen gaen int licht dijnre pilen: inden scijn dijnre blenckender speren.

12

Du sultste treden die aerde in een gheluyt: ende veruaren die volken in dijnre toernicheit.

13

Du biste wtghegaen in salicheit dijns volcs: in salicheit mit dijnen ghesalfde.

14

Du hebtste gheslaghen thoeft vandes boses huys du hebtste bloet ghemaect tfundament totten halse. Du hebtste vermaledijt sijn coninclike macht altijt: den hoefde sijnre striders die quamen als een wint om mi te verstroyen. Hoer verblidinghe. als des gheens die verslint den armen int heymelic.

15

Du hebtste ghemaect dijnen paerden een wech in die zee: int slic veelre wateren.

16

Ic heb ghehoert ende mijn buyc is verstoert: ende mijn lippen hebben ghebeeft van der stemmen. Atter moet in mijn ghebeente ingaen: ende onder mi op springhen. Dat ic mach rusten inden dach der tribulacien: ende opclimmen tot ons opgescorte volc

17

Want die vijchboem en sal niet bloeyen: ende geen vrucht en sal sijn inden wijngaerden. Dat werc des olyuen boems sal lieghen: ende die ackeren en sullen gheen spise toebrenghen. Dat cleen beest sal worden afgesneden vander scaeps koye: ende geen groet beest sal sijn inden crebben.

18

Mer ic sal verbliden inden here: ende ic sal vrolic wesen in god mijnen gesontmaker.

19

God die here is mijn stercheit: ende sal setten mijn voeten als der herten. Ende die verwinre sal mi leiden op mijn hoecheden singende in psalmen