Bible in duytsche (Delftse bijbel 1477)

§ Ca .I.

1

DIe last die abbacuc die propheet ghesien heeft

2

Here hoe langhe sal ic roepen ende du en sultste niet verhoren? Ic sal roepen tot di ghewelt lidende: ende en sultstu mi niet behouden?

3

Waer om

[p. *562]

hebtstu mi getoent boesheit ende arbeit te sien roef ende onrechtuaerdicheit teghen mij? Oerdel ende teghensprekinghe is gheworden machtigher.

4

Daer om is die wet ghescoert: ende trecht en is niet gecomen totten eynde. Want die quade vermach teghen den rechtuaerdigen: daer om sal verkeert oerdel wt gaen.

5

Aensiet inden volken ende siet ende veruaert ende verwondert: want een werc is ghesciet in uwen daghen: dat niemant ghelouen en sal wanneert vertelt sal worden.

6

Want siet ic sal verwecken die van caldeen: een bitter volc ende snel. wanderende op die breetheit der aerden: om te besitten die tabernaculen die hem niet toe en horen.

7

Ontsichlic ende veruaerlic ist oerdeel wt hem seluen: ende sijn last sal wtgaen.

8

Sijn paerden sijn lichter dan die alre snelste dieren: ende snelre dan die auont woluen: ende sijn rijders sullen wijde wtghestort worden. Want sijn riders sullen van verre comen: ende sullen vlieghen als een aern die haest totten eten

9

Alle sullen si comen totten roef. hoer aensicht als een barnende wint. Ende hi sal vergaderen als sant die vanghenisse:

10

ende hi sal verwinning hebben van den coninghen. ende die tyrannen sullen sijn bespottinghe sijn. Hi sal lachen op alle starcke castelen. ende sal tsamen draghen enen val. ende winnense.

11

Dan sal verwandelt worden sijn gheest: ende sal doergaen ende vallen. Dit is sijn starcheit sijns gods.

12

En bistu niet here van beghin mijn god mijn heilich: ende wi en sullen niet steruen? Here du hebtste hem gheset in een oerdeel: ende hebste hem sterck gesticht om dattu berispen soudste.

13

Dijn oghen sijn reyn dattu niet en wiltste sien quaet: ende du en sultste niet moghen sien tot die boesheit. Waer om en sietstu niet op die gheen die quaet doen: ende zwijchste als die verslint den ghenen die rechtuaerdigher is dan hi?

14

Ende du sultste maken die menschen als visschen des zees: ende als een dier dat cruypt op die aerde dat geen prince en heeft.

15

Hi heeftet al op geboert mit sijn hengel ende dat ghetoghen in sijn seghen: ende heeft vergadert in sijn nette. Daer op sal hi verbliden ende vrolic sijn:

16

daer om sal hi offeren sijnre seghen: ende sal sacrificie doen sijnen nette. Want in dien is sijn deel vet gheworden: ende sijn spijse wtuercoren.

17

Daer om heeft hij wtgherect sijn segen: ende en sal niet sparen altoes te doden die volken.