Bible in duytsche (Delftse bijbel 1477)

§ Ca .ij.

1

HEt sal opclimmen die sal verstroeyen bi di ende sal bewaren die belegging Siet den wech: sterc dijn lenden: sterct seer die cracht

2

Want die heer heeft weder ghegeuen die houaerdie iacob: als die houaerdie israhel. Want die verderuers sullense verstroeyen: ende hoer gheslachten sullense verderuen.

3

Die scilt sijnre stercken is vierich: die mannen sijns heers in roden clederen. Ende die toemen der waghenen sijn vierich inden dach sijnre bereyinghe: ende die waghenaers sijn veruaert.

4

Si sijn verstoert inden weghen: ende die waghenen sijn te broken inden straten. Hoer aengesicht als lampen: ende als blixem bijsterlopende.

5

Hi sal ghedencken sijnre sterken: si sullen vallen in horen weghen. Si sullen haestelijc opclimmen die muren: ende die tenten sullen worden bereit.

6

Die poerten der wateren sijn opghedaen ende die tempel is totter aerden verdoruen.

7

Ende die ridderen sijn gheuanghen geleet ende hoer dienstmaechden worden ghedreuen suchtende als duuen: ende murmureerden in hoerre herten.

8

Ende die wateren van niniue sijn als een visscherie: mer si sijn gheuloghen: Staet staet: ende nyemant en si die wederkere

9

Neemt siluer neemt gout: ende gheen eynde en is der rijchdommen van allen begheerliken vaten

10

Niniue is ghedestrueert ghesneden ende ghescoert: ende thert der stercken ontbreect ende die knyen beuen ende ghebrec is in allen lendenen: ende hore alre aensichten als die swartheit des pottes.

11

Waer is die woninge der leeuwen: ende die weye der iongher leeuwen? Die leeuwe heeft ghegaen tot die weye. op dat ingaen soude die ionge leeuwe: ende niemant en is die hem veruaert.

12

Die leeuwe heeft ghenoech gheuanghen sijnen welpen: ende ghedoot sijnen leeuwinnen. Ende heeft geuolt sijn speluncke ende sijn hol mit rouen.

13

Ende die heer der scaren seit. Siet ic sal comen tot di: ende onsteken dijn waghenen totten oppersten: ende tswaert sal eten dijn welpen. Ende ic sal te niet maken dijnen roef vanden lande: ende die stemme dijnre boden en sal niet meer gehoert worden