Bible in duytsche (Delftse bijbel 1477)

§ Ca .I.

1

DIe last niniue. Dat boeck des visioens naum helchesei

2

Die here is toernich die here is wrekende ende heft toren: die heer wreect in sijnen vianden: ende hi is toernich sijnen vianden.

3

Die here is lijdsaem ende groet van starcheit: ende reyn makende. den sondaer en sal niet maken ontsculdich vander pijnen. Die here sijn wegen sijn in onweder ende in wint ende die misten sijn stof sijnre voeten

4

Hi berispt die zee ende maectse droge ende brengt alle wateren tot die woestijn. Basan ende carmelus sijn cranck gheworden: ende die bloem libani is verdorret.

5

Die berghen sijn van hem beroert: ende die houelen sijn verderft. Ende die aerde heeft ghebeeft van sijn aenschijn: ende die werelt. ende alle die daer in wonen.

6

Wie sal mogen staen voert aensicht sijnre onwaerdicheit: ende wie sal wederstaen inden toren sijnre gramscap? Sijn onwaerdicheit is wtghestort als vyer: ende die stenen sijn ghescoert van hem.

7

Die heer is guet ende maect sterc inden dach der tribulacien: ende kent die in hem hopen.

8

Ende in een vloet voerbi gaende sal hi maken verderfnisse sijnre stede: ende die dusternisse sullen veruolghen sijn vianden

9

Wat denct ghi teghen den here? Hi sal maken verdeffenisse. Niet en sal opstaen dubbbel tribulaci:

10

want als die doernen hem ombeuangen: also sal twerscap der gheenre die tsamen drincken. Si sullen worden verteert als een stoppel vol van dorheit.

11

Want wt di sal wtgaen die boesheit teghen den here: ende tracteert mitter herten ouertredinge.

12

Dit seit die here. Is dat si volmaect sijn in starcheit ende veelheit: ende also veel so sullen si worden gheslaghen ende hij sal voerbi gaen. Ic heb di gecastijt: ende ic en sal niet meer di castien.

13

Ende sal nv te wrijuen sijn ruede van dijnen rugge: ende ic sal scoren dijne banden.

14

Ende die heer sal op di ghebieden Niet meer en sal worden ghesaeyt wt dinen naem Ic sal di doden vanden huse dijns gods

[p. *560]

Ic sal setten op dijn graft wtghesneden beelden ende ghegoten:: want du ongheeert biste.

15

Siet op die bergen die voeten des geens die predict: ende boetscapt vrede. O iuda vier dijn hoechtiden. ende betael dijn beloften: want belial en sal niet meer dencken doer te gaen in di: hi is al ghestoruen.