Bible in duytsche (Delftse bijbel 1477)

§ Capitel .iij.

1

WEe die stat der blueden: gheheel ter loghen ghegheuen: ende vol tweedrachts. Den roef en sal van di nyet gaen.

2

Die stemme des gheesels ende tgheluyt vanden bedruschen des wiels ende des paerdes neyen: ende des barnende waghens.

3

ende des riders die daer opclimt. ende des blinckende zwaerds ende des scinende glauijs. ende des veelheits dootgheslaghen. ende des swaren valles. ende der doder lichamen en is gheen eynde. Ende si sullen vallen in horen lichamen.

4

om die veelheit der onkuysheden des schonen ghemeen wiues ende bequaem ende die heeft betoue-

[p. *561]

ringhe: die vercocht heeft die volken in horen onkuysheden.

5

Die here der scaren seit Siet ic sal comen tot di: ende sal openbaren dijn onscamel leden in dijn aensicht: ende ic sal thonen inden volcken dijn naectheit: ende den conincriken dijn bescamenisse.

6

Ende ic sal op di werpen dijn versmadenissen: ende ic sal di pinigen mit lachteren ende ic sal di setten tot een exempel

7

Ende het sal van di sijn dat al die di siet sal vlien: ende segghen. Niniue is verdoruen. Wie sal op di roeren sijn hoeft? Waer van sal ic di soeken enen troester?

8

Bistu beter dan alexandria der volken: die woent inden riuieren? Die wateren sijn in horen omganc: welcs rijcdommen sijn die zee: ende die wateren sijn hoer mueren. Ethiopia was hoer starcheit ende egipten: en is gheen eynde.

9

Affrica ende libien hebben gheweest in dijn hulp:

10

mer oec is si in die ouerwanderinghe gheleit in die vanghenisse Hoer cleen kinderen sijn ghequetset inden beginne alre weghen: ende op hoer edelen hebben si loten geworpen: ende alle hoer opperste sijn gheuest in boeyen.

11

Ende hier om sultstu droncken worden ende sultste sijn versmaet: ende sultste soeken hulp van dijnen viant.

12

Alle dijn beschermenisse sijn als vijchboemen mit horen vruchten: als si ghescud worden vallen si inden mondt des eters.

13

Siet dijn volc: sijn wiven in dijn meddel. Die poerten dijns lants sullen worden opgedaen dinen vianden: tvier sal verslinden dijn grendelen.

14

Puttet di water om die belegginge: timmert dijn bescherminghe Ingaet int slijc ende trede: ende makende hout enen bacsteen.

15

Daer sal di tvyer eten: du sultste vergaen inden swaerde: ende sal di verslinden als een hippelcoren. Hier om wort vergadert als een hippelcoren dat vlogelen heeft ende wort vermenichuoudicht als sprinchaenkijn.

16

Du hebtste dijn comanscappen meerre ghemaect: dan sterren sijn des hemels. Dat hippelcoren is wtgespreit. ende is wech gheuloghen.

17

Dijn bewarers sijn als een sprinchaen ende dijn kinderen sijn als cleyne sprinchanen: die tsamen sitten inden tuynen in den tijt der couden. Die sonne is opgegaen ende si sijn wech gheuloghen: ende hoer stede en is niet bekent daer si geweest hebben.

18

O coninc assur dijn herden hebben gheslapen: dijn princen sullen worden begrauen. Dijn volc heeft ghescuylt inden berghen: ende nyemant en is diese vergadert.

19

Dijn berou en is niet verholen: dijn wonde is alre quaetste. Alle die ghehoert hebben dijn horen: hebben hoer hant mede gedruct op di. Want op wien en is niet ghegaen dijn boesheit altoes?: