Bible in duytsche (Delftse bijbel 1477)

§ Ca .vi.

1

HOert wat die here spreect Stant op ende kiue int recht tegen die bergen ende die houelen moeten hoeren dijn stemme.

2

Die bergen moeten hoeren dat oerdeel des heren ende stercke fondamente der aerden: want oerdeel des heren sal worden gheoerdeelt mit sijnen volc: ende mit israhel.

3

Mijn volc wat heb ic di gedaen of waer in heb ic di moyelic gheweest? Antwoerd mi.

4

Want ic heb di wtgeleet vanden lande van egipten ende vanden huse der dienren heb ic di verlost: ende heb ghesent voer dijn aensicht moysen aaron ende mariam.

5

Mijn volc ic bid dattu gedencste wat balach die coninc moab heeft ghedocht teghen mi: ende wat hem gheantwored heeft balaam beors soen van sethim hent tot galgalam dattu soutste bekennen die rechtuaerdicheden des heren.

6

Wat sal ic waerdich offeren den here? Sal ic bughen mijn knye den hoghen god? Sal ic hem offeren offerhande diemen verbrant ende ionghe calueren?

7

Sal die here moghen worden te vreden gheset inden dusenden der rammen: of in veel dusenden der vetter bocken? Sal ic gheuen mijn eerstgeboren voer mijn sonde: die vrucht mijns buics voer die sonde mijnre sielen?

8

O mensche ic sal di openbaren wat guet is: ende wat die here eysschet van di. Ymmer te doen recht ende te minnen barmherticheit: ende sorchuoudich te wanderen mit dijnen god.

9

Des heren stemme roept tot die stat: ende salicheit sal sijn den ghenen die sijnen naem vreesen. Hoert ghi geslachten. Ende wye sal dat prisen?

10

Noch sijn inden huse des boesen vyer: scatten der boesheit: ende cleen maet. vol des torens.

11

Sal ic rechtuaerdich maken onrechte waghe: ende valsche gewichte des sackes?

12

Inden welcken hoer riken veruolt sijn mit boesheit: ende die daer in wonen spraken loghentael: ende hoer tonghe was bedrieghelic in horen monde.

13

Ende hier om heb ic begonnen di te slaen mit verderfnisse: om dijne

[p. *558]

sonden.

14

Du sultste eten ende niet sat worden: ende dijn vernederinge sal sijn in dijn middel. Ende du sultste aengripen ende niet behouden: ende die du behoudste sal ic gheuen inden swaerde.

15

Du sultste saeyen ende niet maeyen: du sultste treden die olyuen ende niet ghesaluet worden mit den oly: ende den most ende niet drincken den wijn.

16

Ende du hebste bewaert die gheboden amri ende alle werck des huys achab: ende du hebste ghewandert in horen ghenoechten. op dat ic di gheuen soude in verderfnisse: ende die wonen in di in een bespottinghe: ende ghi sult draghen die lachter mijns volcs.