Bible in duytsche (Delftse bijbel 1477)

§ Ca .v.

1

DV sultstu verderft worden moerdenaers dochter. Sij hebben een belegghinge gheset op ons: si sullen slaen mitter roede die wange des rechters van israhel

2

Ende du bethleem effrata: biste cleyn onder den dusenden van iuda. Wt di sal wtgaen mi die sijn sal een heer in israhel: ende sijn wtganc is vanden beghin vanden daghen der ewicheit.

3

Daer om sal hijse geuen tot die tijt: in welc die in arbeit gaet sal voertbrenghen. Die ouerblijuinghe sijnre broederen sullen worden bekeert tot die sonen van israhel.

4

Ende si sal staen ende sal voeden hoer sonen in starcheit des heren: in die hoecheit des namen des heren sijns gods Ende sij sullen worden bekeert: want hi nv sal worden groet gemaect totten eynden der aerden.

5

Ende dese sal sijn vrede. wanneer die. van assyrien is ghecomen in ons lant: ende als hi heeft ghetreden in onsen husen. Ende wi sullen verwecken op hem seuen herden: ende acht vorsten die in dat here sullen sijn.

6

Ende sullen verslinden tlant van assyrien inden zwaerde ende tlant nemroth in horen glauien. Ende hi sal verlossen van assur als hi sal comen in onse lant: ende als hi sal treden in onsen landen.

7

Ende die ouerbliuinghe van iacob sullen sijn int middel veelre volken als douwe vanden here: ende als droppen opt cruyt die niet en verwacht den man: ende niet

[p. *557]

en verbeit die sonen der menschen.

8

Ende die ouerbliuinghe van iacob sullen sijn onder den heydenen int middel veelre volcken als een leeuwe onder den beesten der bosschen. ende als een ionge leeuwe onder den clenen beesten. Welc als hi doergegaen is ende heeft getreden ende gheuanghen: so en is nyemant die verlossen mach.

9

Ende dijn hant sal veheft worden op dijn vianden: ende alle dijn vianden sullen steruen.

10

Ende die here seit het sal sijn in dien daghe: ende ic sal ofhalen dijn paerden van dijn middel: ende sal verderuen dijn wagenen.

11

Ende ic sal verderuen die steden dijns landes ende ic sal verderuen al uwe starcke casteelen.

12

Ende ic sal ofhalen die afgodien van dijnre hant: ende segghinghe toecomender dinghen en sullen niet sijn in di.

13

Ende ic sal doen vergaen dijn afgoden: ende dijn beelden van midden van di Ende du en sultste niet meer aenbeden werken dijnre handen: ende ic sal wtroden dijn bosschen van dijn middel. Ende ic sal te wrijuen dijn steden:

14

ende sal doen wrake mit toernicheit ende mit onwaerde in allen volcken die niet ghehoert en hebben.