Bible in duytsche (Delftse bijbel 1477)

§ Ca .iij.

1

ENde ic heb gheseit. Hoert ghij princen van iacob: ende hertoghen des huys israhel. Hoert v niet toe te weten oerdel:

2

ende hatet guet. ende mint quaet: die mit gewelt ofneemt die vellen van bouen hem: ende hoer vleysch van horen beenen?

3

Die ghegheten hebben tvleysch mijns volcs. ende daer bouen hoer huyt of geuilt: ende hoer gebeente ghebroken: ende te samen ghesneden als in enen ketel: ende als vleysch int middel des pottes.

4

Dan sullen si ropen totten heer ende hi en salse niet verhoren: ende sal bedecken sijn aensicht van hem in die tijt: als si scalkelic ghedaen hebben in horen losen vonden.

5

Die heer seit dit op die propheten die mijn volc verleeden: die biten mit horen tanden. ende prediken vrede? Ende ist dat yemant hem niet en geeft in horen monde: op hem heylich maken si strijt.

6

Daer om sal v duysternisse wesen voer v visioen: ende donckerheit voer v prophecie Ende die sonne sal ondergaen op die propheten: ende die dach sal verdockert worden op hem.

7

Ende die visionen sien sullen bescaemt worden ende die propheten. Ende si sullen alle hoer aensichten decken: wanttet die antwoerd gods niet en is

8

Nochtant bin ic veruolt mit starcheit des geestes sheren: mit oerdel ende cracht: dat ic boetscappen sal iacob sijn sonde: ende israhel sijn misdaet

9

Hoert dit gi princen des huys iacob. ende gi rechteren des huys van israhel: die versmadet oerdeel. ende verkeert alle rechten

10

Die timmert syon inden bloeden: ende iherusalem in die boesheit.

11

Sijn princen hebben gheoerdelt om gauen: ende sijn priesteren hebben gheleert om loen. Ende sijn propheten hebben ghepropheteert om ghelt: ende rusten opten heer seggende. En is die heer niet int middel van ons? Gheen quade dingen sullen op ons coemen?

12

Daer om om uwen wil. sal syon geploecht worden als een acker: ende iherusalem sal sijn als een steenhoep: ende die berch des tempels als die hoecheden der bosschen