Bible in duytsche (Delftse bijbel 1477)

§ Ca .ij

1

ENde ghi die denct onnutticheit wee: ende werct quaet in uwen slaepcameren. Si volbrenghen dat inden morghenstont: want hoer hant is tegen den heer.

2

Ende si hebben begheert die ackeren ende mit ghewelt ghenomen. ende si hebben ghenomen die husen: ende hebben onrecht ghedaen den man ende sijn huysghesin: den man ende sijn erffenisse.

3

Daer om seit die here dit Siet ic denc quaet op dit huysghesin. daer om en suldi niet ofhalen v halsen: ende niet wanderen houaerdich: want die tijt seer quaet is

4

In dien daghe sal op v genomen worden een bispeel. ende een sanc sal ghesongen worden der geenre die seggen mit soeticheit. Wi sijn woest ghemaect mit verdefnisse. Een deel mijns volcs is verwandelt. Hoe sal hi gaen van mi. wanneer wedercomen sal die onse landen deilen sal?

5

Daer om en sal nyemant wesen die erffenisse hebben sal des lants van beloften onder die scare van israhel.

6

En wilt niet spreken segghende. Iacobs huys seit: dese verderfnisse en sal niet drupen op ons: dese bescamenisse en sal ons niet aenvangen.

7

Is die gheest des heren vercort: of sijn soedanich sijn ghedachten? En sijn mijn woerden niet guet mit den genen die rechtuaerdelic wandert?

8

Ende weder om mijn volc is tsamen op ghestaen als een viant. Si hebben ontnomen den mantel van bouen den rock: ende die simpeliken doer ghingen hebben si ghekeert in strijt hem aenvechtende.

9

Ghi hebt wt gheworpen die vrouwen mijns volcs vanden huyse hore ghenoechten: ende hebt genomen mijn lof int ewich van horen kinderen

10

Staet op ende gaet: want ghi en hebt hier gheen rust. Om die onreynicheit der sonden. sal si verderft worden mit die quaetste onreinicheit

11

Och of ic niet en waer een man die den gheest heeft ende spraec meer loghentael. Ic sal op dij drupen in wijn ende in dronckenscap: ende dit volc salt sijn op wient drupen sal.

12

Ic sal vergaderen iacob gheheel in een vergaderinghe: ende ic sal te samen leeden in een die ouerbliuinghe van israhel. Ic sal hem tsamen setten als een kudde scapen in die scaeps koyen. als een beest int middel der scaeps koeyen Si sullen gherucht maken van veelheit der menschen.

13

Want hi sal opclimmen ende openbaren den wech voer

[p. *555]

hem. Hi sal deelen ende si sullen gaen doer die poerte: ende sullen wtgaen doer haer Ende hoer coninc sal gaen bi hem: ende die heer in hoer beghinne.