Bible in duytsche (Delftse bijbel 1477)

§ Ca .I.

1

DEs heren woert dat ghesproken is tot micheam morastiten inden daghen ioatham achaz ende ezechie der coninghen van iuda: dat hi ghesien heeft op samarien ende iherusalem.

2

Hoert alle volcken ende die aerde ende hoer volheit moet aenmerken: ende god die heer moet sijn v in een tuych: die heer van sijnen heilighen tempel.

3

Want siet die heer sal wtgaen van sijnre stede: ende sal nederclimmen ende sal treden op die hoecheden der aerden.

4

Ende die berghen sullen worden verteert onder hem: ende die dalen sullen worden ghescoert als was van teghenwoerdicheit des viers als wateren die haestelic nederlopen.

5

Al dit sal sijn in die sonde iacob: ende inden sonden des huys israhel. Welc is die misdaet van iacob? Ist niet samaria? Ende welc sijn die hoecheden van iuda? Ist niet iherusalem?

6

Ende ic sal setten samarien als een steenhoep inden acker wanneer die wijngaert geplant wort: ende ic sal oftrecken sijn stenen in een dal. Ende ic sal openbaren sijn fondamenten:

7

ende al sijn beelden sullen worden te samen ghesneden. Ende al hoer loenen sullen worden ghebrant mitten vier: ende ic sal setten al horr afgoden in verderfnisse. want si van gemeen wiuen loen vergadert sijn: ende sullen weder keren tot ghemeen wiuen loen.

8

Op dat sal ic screyen ende hulen: ic sal gaen beroeft ende naect. Ic sal maken kermen als draken: ende screyen als die strucen

9

Want gheen hoop en is tot hoerre wonde: want si is ghecomen tot iudam: ende heeft gheruert die poerte mijns volcs tot iherusalem.

10

En wilt niet boetscappen in geth: en wilt niet screyen mit tranen. Inden huyse bestroeyt v mit assche:

11

ende gaet ghi schone woninge. bescaemt mit scande. Si en is niet wtghegaen die woent inden wtganc. Dat huys uwer buerinnen sal ontfaen die screyinghe van v die hoer seluen ghestaen heeft:

12

want is cranc

[p. *554]

gheworden int goet die woent in bitterheden. Want tquaet is neder gheclommen vanden heer in die poerte van iherusalem:

13

tgherucht der waghenen is een verwonderinghe den ghenen die wonen in lachis. Die dochter van syon is een beghinne des sondes: want in di gheuonden sijn die sonden van israhel.

14

Daer om sal die coninck van assirien gheuen oerloechs mannen op die erffenisse geth: ende husen des loghens in bedriechnisse den coningen van israhel

15

Noch sal ic di een erfghenaem toe leeden die woenste in maresa: ende die glori van israhel sal comen tot odolla

16

Wort bloet van haren ende wort gescoren op die sonen dijnre ghenoechten: maect breet dijn caelheit als een aern: want si sijn gheleit geuangen van di