Bible in duytsche (Delftse bijbel 1477)

§ Ca .ij.

1

ENde die here bereide enen groten visch: dat hi ionam verslinden soude. Ende ionas was ints visschen buuck drie daghen ende drie nachten.

2

Ende ionas heeft ghebeden totten here sijnen god wt des vissches buyc.

3

Ende heeft gheseit. Ic heb gheroepen in mijnen verdriet totten heer: ende hi heeft mi verhoert. Ic heb gheropen vanden buyc des walvissche. ende du hebtste mijn stemme verhoert

4

Ende du hebste mi gheworpen int diepe int herte des zees: ende die vloet heeft mi ombeuangen Alle dijn stromen ende dijn vloeden sijn op mi ghegaen.

5

Ende ic heb geseit. Ic bin verworpen vant aensicht dijnre ogen Nochtan sal ic weder sien dijnen heylighen tempel.

6

Die wateren hebben mi onbeuanghen hent tot mijn ziel: die diepheit heeft mi om beleghen: die zee heeft bedect mijn hoeft.

7

Ic bin neder geclommen tot dat wterste der berghen: die grendelen der aerden hebben mi besloten int ewich: ende du here mijn god sultste weder opboren mijn leuen van verderfnisse.

8

Doe mijn ziel in mij banghe wort. heb ic ghedocht des heren: op dat mijn ghebet mach comen tot di tot dinen heiligen tempel.

9

Die bewaren idelheit sullen hoer barmherticheit achter-

[p. *552]

laten.

10

Mer ic sal di offeren in die stemme des loues: ic sal weder gheuen al dat ic gheloeft heb mijnen heer om salicheit.

11

Ende die heer heeft gheseit den visch: ende hi heeft wtghespoghen ionam op die aerde.