Bible in duytsche (Delftse bijbel 1477)

§ Ca .I.

1

ENde sheren woert is gheworden tot ionam die soen was amathi segghende.

2

Stant op: ende ganc in die grote stat niniue. ende predict daer in: want hoer boesheit is op gheclommen bi mi.

3

Ende ionas is op gestaen: om te vlien in tharsis vanden aensicht des heren: ende is neder gheclommen in ioppen: ende heeft gheuonden een scip varende in tharsis Ende gaf sijn sciploen: ende clam neder int scip om mit hem te reisen in tharsis vanden aensicht sheren.

4

Mer die heer heeft ghesent enen groten wint in die zee: ende een groet onweder is gheworden inder zee: ende tscip was in anxt dattet verderuen soude..

5

Ende die scippers vreesden: ende die mannen hebben gheropen tot horen god: ende si hebben wt

[p. *551]

geworpen in die zee die vaten die waren int scip. om tscip te verlichten. Ende ionas is neder gheclommen tot binnenste des sceeps: ende sliep mit swaren slaep

6

Ende die styerman is ghegaen tot hem ende heeft hem gbeseit Wat slaepstu? Stant op ende roep aen dijnen god: of god bi auonturen wil dincken van ons dat wi niet en verderuen.

7

Ende een yegelijc man seide tot sinen gheselle Coemt ende laet ons worpen loten: om te weten waer om dit quaet ons ghecomen is. Ende si worpen loten: ende tlot viel op ionam.

8

Ende si hebben gheseit tot hem. Segt ons om wies sake is ons dit quaet ghecoemen? Wat is dijn werck welc is dijn lant: ende waer gadi of van wat volc bistu?

9

Ende ionas heeft gheseit tot hem Ic bin een hebreeus mensche: ende ic ontsie den heer god shemels die gemaect heeft zee ende aerde.

10

Ende die mannen vreesden mit groter vreese: ende hebben gheseit tot hem Wat hebftu gedaen? Want die mannen bekenden dat hij vloe vanden aenschijn sheren: want ionas hadt hem geopenbaert

11

Ende si seyden tot hem. Wat sullen wi di doen: dat die zee ophoudt van ons? Want die zee verbolghen was ende opvloeyde.

12

Ende hi heeft geseit tot hem: neemt ende werpt mij in die zee: ende die zee sal ophouden van v. Want ic weet: dat om mij dit grote onweder is op v.

13

Ende die mannen roeyden om weder te comen te lande. ende si en mochten niet want die zee ginc ende opvloeyde op hem.

14

Ende si riepen totten heer: ende seiden. Wi bidden heer dat wi niet en vergaen int leuen des mans ende en wilt niet gheuen dat ontsculdich bleut op ons: want du here hebtste ghedaen altstu wiltste.

15

Ende si hebben ghenomen ionam ende geworpen in die zee. ende die zee stont van horen verbolghentheit

16

Ende die mannen vreesden mit groten anxte den here: ende offerden offerhande den here: ende loefden gheloften.