Bible in duytsche (Delftse bijbel 1477)

§ Ca .viij.

1

GOd die heer heeft mij dit ghetoent. Ende siet een haec der appelen

2

Ende heeft gheseit Amos wat sietstu Ende ic heb gheseit. Enen haec der appelen. Ende die heer heeft geseit tot mi Dat eynde is ghecomen op mijn volc israhel. Ic en sal niet meer dencken dat ic hem voerbi sal gaen.

3

Ende god die heer seit die hanghelen des tempels sullen kerren in dien daghe. Veel sullen steruen: ende in allen steden sal worden wech gheworpen tswighen.

4

Hoert dit die den armen verdruct: ende doet die behoeftighe der aerden ontbreken ende segt.

5

Wanneer sal die ouxt voerbi gaen ende wi sullen vercopen ons comanscap. ende die sabboth daermen in rust wi sullen voertdoen onsen tarwe: ende verminren die maet ende vermeeren dat loen ende insetten valsche gewichten:

6

op dat wi besitten moghen in siluer die behoeftighe ende armen om scoen ende wij sullen vercopen tcaf des tarwes.

7

Die heer heeft ghesworen in die houerdie iacob: ic en sal niet vergheten totten eynde al hoer werken.

8

Sal van desen niet beroert worden die aerde: ende sal niet screyen al die woenre der aerden? Hi sal te samen opclimmen als een vloet ende sal worden wtgeworpen ende neder

[p. *548]

vloyen als die riuier egipti.

9

Ende die heer seit in dien daghe sal sijn. die sonne sal ondergaen inden middaech ende ic sal verdonckeren doen die aerde inden dach des lichtes.

10

Ende ic sal verwandelen v hoechtiden in screyen: ende alle uwe sanghen in karmen. Ende ic sal op uwer alre rugghe doen brenghen een sac: ende op alle hoeft bloetheit van haren Ende ic sal haer setten als screyen eens enichs soens: ende hoer vterste als enen bitteren dach.

11

Die heer seit die daghen comen. ende ic sal wtsenden hongher in der aerden: niet honger des broets. noch dorst des waters: mer om te horen sheren woert.

12

Ende si sullen beroert worden van zee tot zee: ende sullen omgaen van noerden totten oesten. ende sullen soeken sheren woert: ende en sullent niet vinden.

13

In dien daghen sullen die scoene maechden ende ionghelinghen ontbreken van dorste.

14

die sweren in die misdaet samarie ende segghen. Dans god leeft: ende die wech van bersabee leeft Ende si sullen vallen: ende voertmeer niet weder opstaen.