Bible in duytsche (Delftse bijbel 1477)

§ Ca .vij.

1

GOd die heer heeft mi dit openbaert. Siet die maker der hippelcoernen int beghin als die coernen beghinnen te spruten ouermids den auont reghen: na den mayer des conincs ist ghesciet.

2

Doe si begonnen te eten dat cruyt der aerden heb ic ghesproken. Heer god ic bidde weest ghenadich. Wie sal verwecken iacob want hi cleyn is?

3

Die heer heeft geseit daer op. Ten sal niet sijn seit die here

4

Ende die here god heeft mi dit ghetoent. Ende siet god die heer heeft gheroepen die rechteren totten vyer: ende heeft verslonden die diepheit der wateren: ende heeft te samen verteert een deel.

5

Ende ic heb geseit Heer god ic bidde rust. Wie sal verwecken iacob want hi cleyn is?

6

Ende die heer heeft ontfermt op hem. Ende heeft gheseit dit en sal oeck niet sijn.

7

God die heer heeft tot mi dit ghetoent. Ende siet die heer was staende op een muer beworpen mit calck: ende in sijn hant was

[p. *547]

een truweel des metselaers.

8

Ende die heer heeft geseit tot mi. Wat sietstu amos? Ende ic seide. Een truweel des metselaers. Ende die here heeft gheseit Siet ic sal opdoen mijn truweel dat is mijn beschermenisse int middel mijns volcks israhel. Ic en sal voertmeer mijn beschermenisse niet op hem leiden:

9

ende die hoecheden des afgods sullen worden verderft. ende die heilichmakinghe israhels sullen te niet worden: ende ic sal opstaen op dat huys iheroboams mitten zwaerde.

10

Ende amasias die priester heeft ghesent in bethel totten coninc van israhel iheroboam segghende Amos is tegen di op ghestaen int middel shuys israhels. Tlandt en sal niet moghen verdraghen alle sijn woerden

11

Want dit seit amos. Iheroboam sal steruen mitten zwaerde: ende israhel sal gaen gheuanghen wt sijnen lande.

12

Ende amasias heeft geseit tot amos. Du die sietste die openbaringhe gods: ganc ende vlie int lant van iuda ende eet daer broet ende propheteert daer:

13

ende en wilt voert meer in bethel niet propheteren: wanttet heilichmakinghe des conincs is ende thuys des rijcs

14

Ende amos heeft gheantwordt: ende gheseit tot amasiam. Ic en bin gheen propheet noch propheets soen: mer ic bin een die mit beesten om gaet ende ic scelle die vijchboemen.

15

Ende god die heer heeft mi genomen doe ic velchde die beesten: ende die heer heeft gheseit tot mi. Ganc ende propheteer tot mijn volc israhel.

16

Ende nv hoert sheren woert Du segtste du en sultste niet propheteren op israhel: ende niet drupen op thuys des afgods.

17

Daer om seit dit die heer. Dijn wijf sal ouerspel doen inder stat: ende dijn sonen ende dochteren sullen vallen mitten zwaerde: ende dijn lant sal biden coerde ghemeten worden Ende du sultste steruen int beulecte lant: ende israhel sal gaen gheuanghen van sijn lant.