Bible in duytsche (Delftse bijbel 1477)

§ Ca .vi

1

WEe u die rijc sijt in syon. Ende betrouwet inden berch van samarien: ghi opperste ende hoefde der volken

[p. *546]

die houaerdelijc ingaet int huys israhel

2

Gaet in chalanne ende van daer int grote emath ende clymt neder in geth ten palestijnen ende tot den besten riken deser ende besiet: of hoer lant breder is dan v lant.

3

Die of ghesceiden sijt ter quader tijt: ende naect den stoel der boesheit.

4

Die slaept in yuoren bedden: ende hebt wellust in uwen gespreiden bedden. Die etet tlam vander cudden. ende die calueren van tmiddel der beesten:

5

die singhet totter stemmen des santorijs Als dauid. hebben si ghemeent te hebben die vaten des sanghes:

6

ende droncken den wijn wt scalen. ende waren besmeert mit seer costelike salue: ende en hadden gheen medeliden op die verderfnisse ioseph.

7

Daer om sullen si nv gaen int beghinne der gheenre die ouergaen in die gheuanghenisse: ende dat werck der onkuysscher menschen sal van hem genomen worden.

8

God die heer heeft ghesworen in sijnre zielen: die heer god der scaren seit. Ic versmade die houardie iacobs: ende ic hate sijn huysen: ende ic sal ouer gheuen die stat mit horen inwoenren.

9

Ende ist datter ouerblijuen sijn thien mannen in enen huse: ende die sullen steruen.

10

Ende sijn naeste sal hem opboren ende barnen hem om wt te draghen sijn ghebeente van den huyse: ende sal segghen den ghenen die is inden cameren des huys. Isser yemant meer bi di?

11

Ende hi sal antwoerden Hier is teynde ic en vinder gheen meer. Ende hi sal hem segghen. Swighet: ende en ghedenct niet des heren naem.

12

Want siet die here heeft gheboden: hi sal slaen tgrootste huys mit vallen ende verderfnissen: ende dat minste huys mit scoeringhen.

13

Moghen die paerden lopen inden stenen: of machmen ploeghen mit buffelen? Want ghi verwandelt hebt recht in bitterheit ende die vrucht der rechtuaerdicheit in alsen:

14

die daer verblijt in niet: ende segt. En hebben wi niet in onser starcheit aen genomen onse hoernen?

15

Want siet spreect die heer god der scaren ghi huysghesinne van israhel. ic sal verwecken op v een volc: ende sal v verderuen vanden inganc emath totter beeck des woestijns.