Bible in duytsche (Delftse bijbel 1477)

§ Ca .v

1

HOert dit woert: dat ic opboer op v screyinghe:

2

thuus israhel is gheuallen: ende en sal nyet beghinnen weder op te staen. Die maecht israhel is geworpen in hoer aerde: ende niemant en is diese verwecken sal:

3

Want dit seit god die heer. Die stede daer wtghinghen dusent. daer sullen ingelaten worden hondert: ende daer wtghinghen hondert sullen ghelaten worden tien inden huse israhel:

4

want dit seit god die heer den huse israhel. Soect mi ende ghi sult leuen:

5

ende en wilt niet soken bethel. Wilt niet ingaen in galgalam. ende wilt niet ouergaen in barsabee: want galgala sal worden gheleit gheuanghen: ende bethel sal sijn onnut.

6

Soect den heer ende leeft: op dat niet bi auentueren thuys iosephs als vier moet worden verbrant: ende sal

[p. *545]

worden verslonden ende niemant sal zijn diet wt doen sal

7

Die verwandelt recht in bitterheit ende laet in der aerden rechtuaerdicheit

8

die gemaect heeft dat seuen gestar ende die ander teikenen des hemels ende die verwandelt die duysternissen in die morghenstont: ende verwandelt den dach in die nacht. Die roept die wateren des sees. ende wtstort die: op die breetheit der aerden: die heer is sijn naem.

9

Die bespot die verderfnisse op den stercken ende brenct op den machtighen verderfnisse.

10

Si hebben ghehaet diese berispten inder poerten: ende si hebben versmaet den genen die volcomelijc sprac.

11

Daer om want ghi beroeft hebt den armen ende ghenomen hebt sijn wtuercoren roef van hem: ghi sult timmeren husen mit viercanten stenen: ende en sult daer niet in wonen. Ghi sult planten die alre waerdichste wijngaerden ende en sult niet drincken horen wijn:

12

want ic beken veel uwe sonden: ende v stercke misdaden. Vianden der rechtuaerdicheit neemt gauen. ende verdruct die armen inder poerten.

13

Daer om sal die wijse swighen in die tijt: want die tijt quaet is.

14

Soect guet ende niet quaet op dat gi moecht leuen ende die heer god der scaren sal sijn mit v als ghi geseit hebt

15

Haet quaet ende mint guet: ende set inder poerten oerdeel: op dat bi auonturen die heer god der scaren ontfermen wil ouer die nablijuinghe ioseph.

16

Daer om seit dit die heer: god der scaren. In allen straten sal sijn screyinghe ende in allen steden die buyten sijn sal worden gheseit we we. Ende si sullen roepen den ackerman tot screyen: ende karmen ende die gheen die connen screyen..

17

Ende in allen weghen sal sijn screyinghe: want ic sal doergaen int middel van di seit die here.

18

Wee den ghenen die begheren den dach des heren. Waer toe begeerdi hem? Dese dach des heren sal sijn duysternisse ende gheen licht.

19

Ghelijc als een man sal vlyen vanden aenschijn des leeuwen ende hem te moet coemt een beer: ende gaet in sijn huys ende leent mit sijn hant op die wande: ende hem bijt een slanghe.

20

Sal die dach des heren niet wesen duysternisse ende geen licht ende donckerheit ende gheen schijn in hem?

21

Ic heb ghehaet ende verworpen v hoechtiden: ende ic en sal niet ontfanghen den roec uwer scaren.

22

Ist dat ghi mi offert offerhanden ende gauen uwe gauen en sal ic niet ontfangen: ende ic en sal niet aensien die begheerten uwer riken.

23

Neemt van mi tgherucht uwer sangen ende ic en sal niet horen die sangen dijnre lyeren.

24

Ende oerdel sal worden openbaert als water: ende rechtuaerdicheit als een stercke beeck.

25

O du ghesinne israhel hebdi mi gheoffert offerhande in der woestijnen veertich iaer?

26

Ende ghi hebt ghedraghen tabernakel moloch uwen god: ende dat beeldt uwer afgoden. die sterre uwes gods rempha ende die beelden die ghi v gemaect hebt om aen te bidden.

27

Ende die heer seit ic sal v doen wanderen ouer damascum: sijnen naem is god der scaren