Bible in duytsche (Delftse bijbel 1477)

§ Capi .iiij

1

HOert dit woert ghi vette coyen die sijt inden berch van samarien. die onrecht doet den behoeftighen ende verderft die armen. Ende gi segt uwen heren: haelt ende wi sullen drincken.

2

God

[p. *544]

die heer heeft gesworen in sinen heilige want siet die daghen sullen comen op v. ende si sullen v opboren in den glauien. ende v overbliuinge in heten potten

3

Ende gi sult wtgaen doer die scoeren der mueren die een teghen den anderen ende die heer seit: ghi sult worden gheworpen in armon.

4

Coemt tot bethel ende doet quaet: tot galgalam ende maect veel ouertredinghe. Ende offert des morghens v offeranden: ende v tienden drie daghen duerende.

5

Ende offert van die gherst lof: ende roept willighe offerhande ende boetscapt God die heer seit. aldus hebdi begheert gij sonen israhel.

6

Daer om sal ic v gheuen hongher in al uwen steden ende gebrec broots in al uwen plaetsen: ende die heer seit ghi en sijt niet wedergekeert tot mi.

7

Ende ic heb verboden den regen doe noch drie maenden waren totten ouxt ende ic hebt doen regneren op die een stede: ende op die ander stede niet. Dat een deel is bereghent: ende dat ander daer gheen regen op en viel is verdorret.

8

Ende twee ende drie steden sijn gecomen tot een stat om te drincken water: ende sij en sijn niet versadet: ende die heer seit ghi en sijt niet weder ghecomen tot mi.

9

Ic heb v gheslaghen mit een barnende wint ende mit een droghende wint: ende die rupe heeft ghegheten die veelheit uwer houen ende uwer wijngaerden v olijfbomen ende v vijchboemen: ende die heer seyt ghij en sijt niet weder ghekeert tot mij.

10

Ic heb in v ghesent den doot inden wech egipti: ic heb v ionghen geslaghen met den swaerde tot die vangenisse uwer paerden. ende ic heb die onreynicheit uwer scaren doen opclimmen in v noesen: ende die heer seit ghi en sijt nyet weder ghecomen tot mi.

11

Ic heb v omghekeert als god heeft omghekeert sodomam ende gomorram: ende ghi sijt gheworden als een stock ontsteken vanden brande: ende die heer seit ghi en sijt niet wederghekeert tot mij.

12

Daer om israhel sal ic v dese dinghen doen Mer als ic di dit doen sal israhel: wort bereit in te ghemoet te gaen dijnen god

13

Want siet die maect die berghen ende scept den wint ende boetscapt den mensche sijn spraeck: ende maect den neuel des morghens ende gaet op die hoecheit der aerden: sijn naem is heer god der scaren.