Bible in duytsche (Delftse bijbel 1477)

§ Ca .iij.

1

GHi sonen israhel hoert twoert dat die heer ghesproken heeft op v: op al v gheslachten die ic wtgheleit hebbe vanden lande egipti segghende.

2

Ic heb v alleen bekent. wt allen gheslachten der aerden: daer om sal ic visiteren op v alle v boesheden.

3

Sullen twee te samen wanderen: ten si saec dat hem bequaem is?

4

Sal die leeuwe briesschen inden bosch: ten si dat hi enen roef heb? Sal die ionghe leeuwe gheluyt gheuen van sijnen hol: ten si dat hi wat gheuanghen heeft?

5

Sal die voghel vallen in die stric der aerden: sonder voghelaer? Sal die stric of ghenomen worden vander aerden: eer si wat gheuanghen heeft?

6

Sal die trompet gheluyt maken inder stat: ende tvolc sal niet vresen? Sal daer enich quaet sijn inder stat: dat die heer niet gedaen en heeft?

7

Want god die heer en sal geen woett doen. ten si dat hi openbaert sijn heimelicheit tot sijnen knechten den propheten.

8

Die leeuwe sal briesschen: wie sal niet vresen God die heer heeft ghesproken. wie en heeft nyet gepropheteert?

9

Maect bekent inden husen azoti: ende inden husen des lands van egipten ende segt. Wort vergadert op die berghen samarie ende siet veel raserien int middel van hem: ende verdriet des gheens die lijdt in sijnen cameren.

10

Ende die heer seit. si en hebben niet geweten recht te doen ende hebben vergadert boesheit ende rouen in horen husen.

11

Daer om seit dit god die heer Die aerde sal worden gecastijt ende om gegaen ende dijn starcheit sal van di ghetogen worden: ende dijn husen sullen beroeft worden.

12

Dit seit die heer. Als die herde wt trect wt des leeuwen mont twee benen of een stick van een oer: also sullen die sonen israhel worden wt getoghen die wonen in samarien inden lande des beddes. ende inden bedde damasci.

13

Die here god der scaren seit. hoert ende tuycht in den huse iacob:

14

want in dien daghe als ic sal beghinnen te visiteren die ouertredinghe israhel: op hem sal ic oec visiteren. op die outaren bethel. ende die hoornen des outaers sullen worden ofghesneden. ende sullen vallen in der aerden.

15

Ende die heer seit Ic sal slaen dat winter huys mitten somer huys. ende veel yuorien husen sullen vergaen: ende veel husen sullen worden verstroeyt