Bible in duytsche (Delftse bijbel 1477)

§ Ca .ij.

1

DIe here seit dese dinghen. van drien sonden moab ende van vieren. sal ic hem niet bekeren. daer om want hi onsteken heeft die ghebeente des conincs van ydumeen tot asschen.

2

Ende ic sal senden vyer in moab ende sal verslinden die huysen carioth: ende moab sal steruen inden gheluyt der wapenen ende des strijts inden clanc der basunen.

3

Ende ic sal verstroeyen die rechteren van sijn middel. ende ic sal doden al sijn princen mit hem seit die here.

4

Dit seit die heer Van drien sonden iuda ende van vieren sal ic hem niet bekeren. Daer om want hi van hem ghworpen heeft die wet des heren: ende heeft niet bewaert sijn geboden. Want sijn afgoden hebben hem bedrogen: na welcken hoer vaderen sijn ghegaen.

5

Ende ic sal vyer senden in iudam ende sal verslinden die huysen iherusalem

6

Die heer seit dese dinghen. Van drie sonden israhel ende van vieren sal ic hem niet bekeren. daer om want hi vercocht heeft den rechtuaerdighen om siluer ende den armen om scoen.

7

Ende die te wriuen die hoefden der armen bouen stof der aerden: ende si doen wiken den wech der oetmoedigher. ende soon ende vader sijn ghegaen tot een maecht. om dat si ghewelt doen souden mijnen heyligen name.

8

Ende op die clederen die si te pand hadden vanden armen. hebben si gheseten ten eten. bi alle outaren: ende hebben ghedroncken wijn der verdoemder inden huyse hoers gods.

9

Mer ic heb verdreuen van hoer aensicht amorreum. wies hoecheit was als die hoecheit der cederbomen: ende hi was starc als die akerboeme. Ende ic heb te wreuen sijn vrucht van bouen: ende sijn wortelen onder.

10

Ic bin die v heb doen opclimmen vanden lande egipti. ende heb v wtgheleit in die woestijn veertich iaren. dat ghi besitten sout tlant amorrei.

11

Ende ic heb verwect van uwen sonen tot propheten: ende van uwen iongen nazareen. dat sijn gheheylichde. Ghi sonen israhel seit die heer. ist also niet?

12

Ende ghi scenc-

[p. *543]

tet den nazareen wijn. ende den propheten hebdi geboden seggende. En wilt niet propheteren.

13

Siet ic sal knersen onder v als knerst een waghen gheladen mit hoey.

14

Ende die vlieghinghe sal vergaen vanden snelle: ende die starcke sal niet houden sijn cracht. ende die stercke sal niet gesont maken sijn siel.

15

Ende die den boech hout en sal niet staen. ende die snelle sal niet behouden worden mit sijnen voeten. Ende die rider sal niet behouden sijn leuen:

16

ende die stercke van herten onder den stercken sal vlien naect in dien daghe seit die heer.