Bible in duytsche (Delftse bijbel 1477)

§ Ca .I

1

DIe woerden amos die was inden weyen thechue. welc hi gesien heeft op israhel: inden daghen osie des conincs iuda ende inden dagen iheroboam ioas soen die coninc was ouer israhel voer twee iaren des aerdbeuings.

2

Ende heeft gheseit. Die heer sal roepen van syon ende van iherusalem sal hi sijn stemme gheuen. Ende die schoen woninge der herden hebben ghescreit: ende dat opperste des berchs cameli is verdroecht.

3

Dit seit die heer. Van drien sonden damasci ende van vieren sal ic hem niet bekeren: daer om want hi ghepijnt heeft mit yseren instrumenten die van galaad.

4

Ende ic sal vyer senden int huys azahel: ende sal verslinden die husen benadab.

5

Ende ic sal te wriuen die starcheit damasci. ende ic sal verstroeyen den woenre vanden velde des afgods. ende den coninc vanden huyse der genuechten: ende die heer seit dattet volc van syrien sal ouer gheuoert worden tot cyrenen.

6

Dese dinghen seit die heer. Van drien sonden gaze ende van vyeren. en sal ic hem niet bekeren: daer om want si ouerghebrocht hebben die vanghenisse. om te verhueren ende te vercopen tot knechten in ydumeen.

7

Ende ic sal senden vyer in die muyer der stat gaze. ende ic sal versliden hoer huysen:

8

ende ic sal verderuen den inwoenre van azoto: ende den coninc van ascalon. ende ic sal mijn hant keren op accaron. ende alle die andere der philisteen sullen vergaen

[p. *542]

seit die heer

9

Dit seit die heer. Van drie sonden cyri ende van vyeren. sal ic hem niet bekeren. Daer om dat si besloten hebben die gheuanghenisse in ydumeen ende hebben niet ghedachtich gheweest der vorwaerde hoerre broederen.

10

Ende ic sal senden vyer in die muyer cyri: dat sal verslinden sijn huysen.

11

Dit seit die heer. Van drie sonden edom ende van vyer. sal ic hem niet bekeren: daer om dat hi veruolcht heeft sijnen broeder mitten zwaerde ende heeft vercracht sijn ontfermharticheit. ende heeft sijn gramscap voert an ghehouden. ende sijn onwaerdicheit tot in den eynde.

12

Ic sal vyer senden in theman: ende tsal verslinden die huysen bosre

13

Dit seit die heer Van drie sonden der sonen ammon ende van vier. sal ic hem niet bekeren: daer om want hi gecloeft heeft die kindraghende vrouwen van galaad: om te verbreiden sijn lant.

14

Ende ic sal ontsteken in die muer rabbath vyer. dat sal verslinden sijn huysen. in hulinghe inden dach des strides. ende in onweder ende in den daghe der beroeringe.

15

Ende melchon sal gaen in die vanghenisse: hi ende sijn princen te samen seit die heer.