Bible in duytsche (Delftse bijbel 1477)

§ Capitel .ix.

1

IC heb den heer ghesien staende opt outaer. Ende seide. Slaet dat fondament des tempels: ende die ouerste dorpelen sullen worden beroert. want ghiericheit is int hoeft alder menschen ende ic sal den vtersten doden inden swaerde. Si en sullen niet mogen vlien. Sij sullen vlien: ende nyemant sal behouden bliuen vanden genen die sullen vlien

2

Ist dat si neder clommen totter hellen. mijn hant salse weder wtleiden van daer: ende waert dat si opclommen totten hemel. ic salse van daer oftrecken.

3

Ende ist sake dat si verholen waren int opperste des berchs carmeli. ic salse onder soeken ende halen van daer: ende waert sake dat si hem seluen huden van mijnen oghen int diepe des zees: ic sal daer gebieden den serpente. ende die salse bijten.

4

Ende waert dat si ginghen in vangenisse bi horen vianden. ic sal daer ghebieden den swaerde dat salse dootslaen ende ic sal setten mijn oghen op hem in quaet ende niet in guet.

5

Ende die here god der scaren die roert die aerde ende si ontbreect: ende alle die daer in wonen sullen screyen. Ende een yghelijc sal opclimmen als een riuier: ende neder vloeyen als die vloet egipti.

6

Die timmert inden hemel sijn opclimminghe. ende heeft gesticht een bondekijn op der aerden. Die roept die wateren des zees ende stort die op die breetheit der aerden Die heer is sijn naem.

7

Die heer seit. ghi sonen van israhel en sidi mi niet als sonen der morianen? En heb ic niet israhel doen opclimmen vanden lande van egipten: ende die palestijnen van capadocien: ende die van syrien van cyrenen?

8

Siet des heren oghen sijn op een rijc dat sondicht: ende ic sal dat te wrijuen vanden aenschijn der aerden. Nochtan wriuende en sal ic niet te wriuen seit die heer thuys van iacob.:

9

Want siet ic sal ghebieden: ende ic sal slaen in allen volcken thuys israhel. als gheslaghen ende gescudt wort die tarwe inden seue: ende een steenken en sal niet vallen op die aerde.

10

Alle die sonders mijns volcs sullen steruen inden swaerde.

[p. *549]

die segghen tquaet en sal niet naken: ende tquaet en sal niet comen op ons

11

In dien daghe sal ic verwecken dat tabernakel dauids dat gheuallen is: ende ic sal weder timmeren die scoren sijnre muren ende ic sal weder maken datter gheuallen is. Ende ic sal hem weder timmeren als inden ouden daghen:

12

dat si besitten moghen die ouerblijuinghe van ydumeen ende alle heydenen: daer om want mijnen naem is aengheropen op hem dit seit die here die dese dingen doet.

13

Die heer seit. siet die daghen sullen comen ende die ploger sal aengripen den maeyer: ende die treder der wijnparsen den genen die tsaet saeyt. Ende die berghen sullen wt gheuen soeticheit: ende alle die houelen sullen ghebouwet worden.

14

Ende ic sal bekeren die vanghenisse mijns volcs van israhel: ende si sullen timmeren steden die woeft sijn ende ghelaten ende sullen daer in wonen: ende sullen planten wijngaerden ende drincken den wijn daer van: ende sullen maken houen ende sullen eten die vruchten daer of.

15

Ende ic salse planten op hoer aerde: ende en salse voertmeer niet oftrecken van hoer lant dat ic hem ghegheuen heb. dit seit die heer dijn god.