Bible in duytsche (Delftse bijbel 1477)

§ Capittel .ij.

1

SInghet mitter trompetten in syon: huylt in mijnen heylighen berch. Alle woenrers der aerden moeten verstoert worden. want die dach des heren coemt:

2

want bi is die dach der duysternissen ende des donckerheits: die dach des wolkes ende onweders. Als die morghenstont is veel volcs ende starc wtgespreit op die berghen. Van beghin en heeft nye hem ghelijc gheweest: ende na hem salt niet wesen tot inden iaren der gheslachten.

3

Voer sijn aensicht sal sijn verslindende vier: ende achter hem barnende vlamme. Als een hof der ghenuechten was die aerde voer hem: ende na hem enicheit des woestijns. ende niet en is die hem ontvlien sal.

4

Hoer aensicht is alst aensicht der paerden: ende als riders sullen si lopen. Alst gheluyt der waghenen op die hoefden der berghen sullen sie wtspringhen.

5

Als gheluyt des viers dat verslint die stoppelen: als starc volc bereit totten stride

6

Van sijn aenschijn sullen die volken gepijnt worden:ende alle aensichten sullen worden swart als een pot.

7

Si sullen lopen als starcke: ende sullen opclimmen die muer als mannen gheleert ten stride. Die mannen sullen gaen in horen weghen: ende sullen niet wiken van horen weghe.

8

Niemant en sal sijn brueder benauwen. een yeghelijc sal wan-

[p. *539]

deren in sijnen wech. Ende si sullen vallen doer di vensteren: ende sullen niet ghequetst worden.

9

Sij sullen gaen in die stede: ende lopen op die mure. Si sullen climmen op die huysen: ende ingaen doer die ventsteren als een dief.

10

Van sijn aenschijn heeft die aerde ghebeeft: die hemelen sijn beroert Die sonne ende die mane sijn verdonckert: ende die sterren hebben tot hem ghetoghen horen schijn.

11

Ende die heer heeft sijn stem ghegeuen voert aenschijn sijns heers: want seer veel sijn sijn scaren. want starc ende doende den wille des heren. Want groet is sheren dach ende seer veruaerlijc. Ende wie sal hem verdraghen? Daer omme seit mi die heer.

12

Wort bekeert tot mij in al uwer herten. in vasten. ende screyen ende in kermen:

13

ende snijt v herten ende niet v clederen Ende wort bekeert totten heer uwen god: want hi guedertieren is ende barmhertich lijdsaem ende van veel barmherticheden ende milde om die boesheit te vergheuen

14

Wie weet of god bekeert sal worden ende vergheuen: ende laten na hem benedictie? Sacrfifici ende offerhande si den here onsen god.

15

Singt mitter basunen in syon. heilich maect den vasten roept die scare.

16

vergadert tvolc. maect heilich die vergaderinge: brenct bi een die ouden. vergadert die cleyn kinderen ende die sughen die borsten. Die brudegom moet wtgaen wt sijn slaepcamer ende die bruut wt haer slaepcamer:

17

Tusschen den poertael ende dat outaer sullen screyen die priesteren. dienre sheren ende sullen segghen. Spaert heer spaert dijn volc. ende wilt niet gheuen dijn erfnisse in lachter: dat die heyden heerscappie ouer hem hebben. Waer om segghense onder den volken. waer is hoer god?

18

Die heer heeft ghemint sijn lant: ende heeft ghespaert sijn volc

19

Ende die here heeft gheantwort: ende geseit sijnen volc. Siet ic sal v senden tarwe ende wijn ende olye: ende ghi sult worden veruult van hem. ende ic sal v niet meer gheuen lachter onder den heydenen.

20

Ende ic sal verre van v maken den ghenen die van noerden is: ende ic sal hem verdriuen in een woest lant daer gheen wegen in en sijn. Sijn aensicht teghen die ooster zee. ende sijn vterste tot die leste zee: ende die stanck sal opclimmen. Ende sijn onreynicheit sal opclimmen: want hi houaerdelic gedaen heeft

21

O aerde en wilt niet vresen verblijt di ende weest vrolick want die heer heeft groet gemaeckt dat hijt doen sal.

22

Ghi beesten des lands en wilt niet vresen want die schone landen des woestijns hebben vrucht voert ghebrocht. Want die boem heeft toe gebrocht sijn vrucht die vijchboem ende wijngaert hebben hoerr cacht ghegeuen.

23

Ende ghi dochtere syon verblijt v ende weest vrolick inden heer uwen god. want hi v ghegeuen heeft een leerre der rechtuaerdicheit: ende die heer sal doen nedercomen op v reghen des morghens ende auont reghen als int beghinne.

24

Ende die hoefsteden sullen worden veruult mit tarwe: ende die wijnparsen sullen veruloyen mit wijn ende olye.

25

Ende ic sal v weder gheuen die iaren die ghegheten hebben die hippelcoernen ionc ende out die droghende

[p. *540]

wijnt ende rupe ende rijm: grote starcheit die ic in v ghesent heb.

26

Ende ghi sult eten ende sat worden ende sult louen den naem sheren uwes gods: die mit v wonderlike dinghen ghedaen heeft. Ende mijn volc sal niet bescaemt worden inder ewicheit:

27

ende ghi sult weten want ic bin int middel van israhel. Ende ic bin die heer v god ende nyemant meer: ende mijn volc sal niet bescaemt worden inder ewicheit.

28

Ende het sal sijn nae desen. ic sal wtstortten mijnen gheest op alle menschen die sacht van herten sijn: ende v sonen ende dochteren sullen propheteren. V ouden sullen godlike openbaringhe hebben in horen slaep: ende v ionghen sullen sien visionen.

29

Mer oeck in dien daghen salic wtstortten mijnen gheest op mijn knechten ende mijn maechden:

30

ende ic sal gheuen veruaerlike teykenen inden hemel ende in der aerden. bloet ende vyer ende wasem des roecs.

31

Die son sal verwandelt worden in duysternissen. ende die maen in bloet. voer dat comen sal die grote ende veruaerlike dach des heren.

32

Ende het sal welen. dat al die aenroept den naem sheren sal behouden sijn. want inden berch syon ende in iheruslem sal sijn behoudinghe als die here gesticht heeft ende inden anderen die die heer gheroepen heeft.

33[3:1]

want siet in dien daghen ende in die tijt als ic bekeren sal die gheuangenisse iuda ende iherusalem.

34[3:2]

sal ic vergaderen alle volcken. ende salse leiden int dal van iosaphat. ende sal daer disputeren van hem van mijn volc ende mijn erffenisse israhel die si ghestroeyt hebben onder die heydenen:

35[3:3]

ende hebben mijn lant gedeylt ende lot gheworpen op mijn volc. Ende hebben die knecht geset in bordeel: ende die maechden vercocht om wijn op dat si drincken souden.

36[3:4]

Mer wat is mi ende v tyrus ende sydon ende al eynde der palestijnen? Suldi voer mi wraeck gheuen? Ende ist sake dat ghi wraect teghen mi: ic sal v haestelijc ghering wedergheuen verdiende pijn op v hoeft.

37[3:5]

Want ghi hebt mijn siluer ende mijn gout ghenomen: ende mijn yuwelen ende alre schoenste verchieringe hebdi ghedraghen in uwe templen der afgoden.

38[3:6]

Ende ghi hebt vercocht die sonen iuda ende die sonen iherusalem den sonen der gryecken: op dat ghise vermaken soudt van horen landen.

39[3:7]

Siet ic salse verwecken vander stede daer ghise in vercocht hebt: ende ic sal bekeren v weder gheuen in v hoeft

40[3:8]

Ende ic sal vercopen v sonen ende v dochteren inden handen der sonen iuda. ende die heer heeft ghesproken sij sullen die vercopen den sabeen een volc dat verre gheseten is

41[3:9]

Roept dit inden volcken maect heylich den strijt: verwect die stercke. Alle mannen die ten stride dienen moeten opclimmen ende toegaen.

42[3:10]

Maect v ploeghen tot zwaerden: ende v spaden tot piecken. Die crancke segt: want ic starck bin

43[3:11]

Wtscoert ende roemt alle volcken vanden omganc: ende wort vergadert. Daer sal die heer doen steruen dijn stercke.

44[3:12]

Die volcken moeten tsaemen opstaen ende opclimmen int dal iosaphat want daer sal ic sitten om te oerdelen alle die volcken inden omganc

[p. *541]

45[3:13]

Send v zekelen in tcoren: want tcoren is rijp gheworden. Coemt ende nederclimmet: want die wijnpars is vol Die wijnparsen loepen ouer: want hoer boesheit is vermenichuoudicht.